Links

എന്താണ് ഹാർട്ട് ബ്ലോക്ക് ?

ഇന്ന് ധാരാളമായി കാണുന്ന ഒരു രോഗമാണ് ഹാർട്ട് ബ്ലോക്ക്. അതിനെപ്പററി കൂടി ഒന്നെഴുതിയാൽ ധാരാളം ആളുകൾക്ക് ഉപകാരമാവും എന്ന് ഒരു സുഹൃത്ത് ആവശ്യപ്പെട്ടത് കൊണ്ടാണ് ഈ പോസ്റ്റ്. ഹാർട്ട് ബ്ലോക്ക് എന്ന് കേൾക്കുമ്പോൾ ഹൃദയത്തിൽ കൊളസ്ട്രോളും കൊഴുപ്പും അടിഞ്ഞുകൂടി ഉണ്ടാകുന്ന ബ്ലോക്ക് എന്നാണ് ആളുകൾ കരുതുക. എന്നാൽ അത് വേറെയാണ്. രക്തധമനികളിൽ പ്ലേക്ക് രൂപപ്പെട്ട് രക്തയോട്ടം തടസ്സപ്പെടുന്ന അവസ്ഥയെ പറ്റി പറയുന്നതിനു മുൻപായി സാധാരണ കണ്ടുവരുന്ന ഹാർട്ട് ബ്ലോക്ക് എന്താണെന്ന് നോക്കാം. ഇംഗ്ലീഷിലും മലയാളത്തിലും പല പേരുകളിൽ പറയുന്നതും ഹൃദ്രോഗം എന്ന് പൊതുവെ പറയുന്നത് കൊണ്ടും ഇക്കാര്യത്തിൽ ആളുകൾക്ക് കൺഫ്യൂഷൻ ആണുള്ളത്. 

ഹൃദയം എന്നത് ശരീരത്തിന്റെ എല്ലാ കോശങ്ങളിലേക്കും രക്തം പമ്പ് ചെയ്ത് എത്തിക്കുന്ന ഒരു മെഷീൻ എന്ന് പറയാം. അങ്ങനെ പമ്പ് ചെയ്ത് ശുദ്ധരക്തം ഒഴുകുന്ന കുഴലിനെ ധമനികൾ എന്ന് പറയുന്നു. ധമനികളിലൂടെ എല്ലാ കോശങ്ങളിലും ശുദ്ധരക്തം എത്തിക്കുമ്പോൾ എല്ലാ കോശങ്ങളിൽ നിന്നുമുള്ള അശുദ്ധരക്തം ശുദ്ധീകരിക്കാൻ വേണ്ടി തിരിച്ച് ഹൃദയത്തിലേക്ക് എത്തിക്കുന്ന കുഴലുകളെ സിരകൾ എന്ന് പറയുന്നു. ഇത് ശരിക്കും മനസ്സിലാക്കാൻ ഹൃദയത്തിന്റെ ചിത്രം നിങ്ങളുടെ മനസ്സിൽ പതിയണം. ഹൃദയത്തിനു നാല് അറകൾ ഉണ്ട്. മേലെ വലത്തും ഇടത്തുമായി രണ്ട് അറകളും കീഴെയും വലത്തും ഇടത്തുമായി  രണ്ട് അറകളുമാണുള്ളത്. മേലത്തെ അറകളെ വലത് ഏട്രിയം (right atrium) എന്നും ഇടത് ഏട്രിയം (left atrium) എന്നും പറയുമ്പോൾ കീഴെയുള്ള അറകളെ വലത്, ഇടത് വെൻട്രിക്കിൾ (right ventricle and left ventricle) എന്നും പറയുന്നു. ഇതിനോടൊപ്പമുള്ള ചിത്രം നോക്കി മനസ്സിലാക്കുക. 

സിരകളിൽ കൂടി വരുന്ന ആശുദ്ധരക്തം മഹാസിരയിലൂടെ ഹൃദയത്തിന്റെ വലത്തെ ഏട്രിയത്തിൽ പ്രവേശിക്കുന്നു. അവിടെ നിന്ന് ആ അശുദ്ധരക്തം കീഴെയുള്ള വലത്തെ വെൻട്രിക്കിളിൽ കടക്കുന്നു. അവിടെ നിന്ന് അശുദ്ധരക്തം ശ്വാസകോശങ്ങളിലേക്ക് പമ്പ് ചെയ്യപ്പെടുകയും അശുദ്ധരക്തത്തിലെ കാർബൺ ഡൈ‌ഓക്സൈഡ് ശ്വാസകോശങ്ങളിൽ ഉപേക്ഷിക്കുകയും ഓക്സിജൻ സ്വീകരിക്കുകയും ചെയ്യുന്നു. ഇങ്ങനെ ശുദ്ധീകരിക്കപ്പെട്ട രക്തം ശ്വാസകോശങ്ങളിൽ നിന്ന് ഹൃദയത്തിന്റെ ഇടത്തേ ഏട്രിയത്തിൽ എത്തുന്നു. പിന്നെ അവിടെ നിന്ന് കീഴെയുള്ള ഇടത്തെ വെൻട്രിക്കിളിലും എത്തുന്നു. അവിടെ നിന്നാണ് ഓക്സിജൻ സമ്പുഷ്ടമായ ശുദ്ധരക്തം മഹാധമനിയിലേക്കും പിന്നെ ശാഖോപശാഖകളായ ധമനികളിലേക്കും പമ്പ് ചെയ്യപ്പെടുന്നത്. ഇപ്രകാരം പമ്പ് ചെയ്യുന്നതിനെയാണ് ഹൃദയമിടിപ്പ് എന്ന് പറയുന്നത്. ഹൃദയം ഒരു മിനിറ്റിൽ ശരാശരി 72 തവണ മിടിക്കുമെങ്കിലും 60 മുതൽ 100 വരെ ഒരു മിനിറ്റിൽ മിടിക്കുന്നത് നോർമൽ ആണ്. 


ഹൃദയം ശുദ്ധരക്തം പമ്പ് ചെയ്ത് ശരീരത്തിന്റെ എല്ലാ കോശങ്ങളിലും എത്തിക്കുന്നുണ്ടെങ്കിലും , ഹൃദയത്തിനു രക്തം എത്തിക്കാൻ വേറെ സംവിധാനം ആണുള്ളത്. അതായത് ഹൃദയത്തിനു പ്രത്യേകമായി ഹൃദയധമനികളും സിരകളും ആണുള്ളത്. ഹൃദയം ഒരു പേശിയാണ്. ശരീരത്തിന്റെ അടിസ്ഥാന യൂനിറ്റ് കോശമാണല്ലൊ. ഒരേ ഘടനയും പ്രവർത്തനവും ഉള്ള സമാന കോശങ്ങൾ ചേർന്ന് കലകൾ (tissue) ഉണ്ടാകുന്നു. കലകൾ ചേർന്ന് പേശികളും അവയവങ്ങളും ഉണ്ടാകുന്നു. അവയവങ്ങൾ ചേർന്നതാണ് നമ്മുടെ ശരീരം.  ശരീരത്തിലെ ഏറ്റവും വലിയ അവയവം ചർമ്മം ആണ്. ശരീരകോശങ്ങളിലായാലും ഹൃദയപേശിയിലെ കോശങ്ങളിൽ ആയാലും രക്തത്തിന്റെ പ്രധാന ജോലി ഓരോ കോശങ്ങളിലും പോഷകങ്ങളും ഓക്സിജനും എത്തിക്കുക എന്നതാണ്. ഹൃദയത്തിനും പോഷകങ്ങളും ഓക്സിജനും വേണം. പോഷകങ്ങളുടെ ആവശ്യം ശരീരത്തിന്റെ പുതിയ കോശനിർമ്മിതിക്കും ഊർജ്ജം ഉല്പാദിപ്പിക്കാനുമാണ്. ഒരു കോശത്തിനു മൂന്ന് മാസം മാത്രമേ ആയുസ്സുള്ളൂ. അതുകൊണ്ട് പുതിയ കോശങ്ങളുടെ നിർമ്മാണം ശരീരത്തിൽ അനവരതം നടക്കുന്നുണ്ട്. ഓക്സിജന്റെ ആവശ്യം ഊർജ്ജം ഉല്പാദിപ്പിക്കാനാണ്. പോഷകങ്ങളിലെ ഗ്ലൂക്കോസ് ഓക്സിജനുമായി കോശങ്ങളിൽ വെച്ച് സംയോജിക്കുമ്പോഴാണ് ഊർജ്ജം ഉണ്ടാകുന്നത്. നിലയ്ക്കാത്ത ഊർജ്ജോല്പാദനം ആണ് ജീവൻ നിലനിർത്തുന്നത്. ശ്വാസോച്ഛ്വാസത്തിന്റെ പ്രാധാന്യം അതാണ്. 

ഇനി എന്താണ് ഹാർട്ട് ബ്ലോക്ക് എന്ന് നോക്കാം. ഹൃദയം മിടിക്കുന്നത് , ഹൃദയത്തിന്റെ വലത് മേൽ ഭാഗത്തെ ഏട്രിയം  അറയിൽ (right atrium) നിന്ന് ഒരുമാതിരി ഇലക്ട്രിക്കൽ സിഗ്നൽ അല്ലെങ്കിൽ പഴ്സ്  ഉത്തേജിപ്പിക്കപ്പെടുമ്പോഴാണ്. വലത് ഏട്രിയത്തിലെ പ്രത്യേക തരം കോശങ്ങളാണ് ഈ പഴ്സ് പുറപ്പെടുവിക്കുന്നത്. ചിത്രത്തിൽ നോക്കുക, Sino atriai എന്ന ഇടത്തിൽ നിന്നാണ് ഈ സിഗ്നൽ പുറപ്പെടുന്നത്. ഇതിനെ Sinoatrial Node എന്നും ചുരുക്കി SA Node എന്നും പറയും. ഈ SA Node എന്നത് ഹൃദയത്തിൽ ജന്മനാ ഉള്ള നേച്വറൽ പേസ്‌മേക്കർ എന്ന് പറയാം. കാരണം ഇതാണ് ഹൃദയമിടിപ്പ് ഉണ്ടാക്കുന്നത്. കൃത്രിമമായ പേസ്‌മേക്കറും ഈ നാച്വറൽ പേസ്‌മേക്കറും ചെയ്യുന്നത് ഒരേ ജോലിയാണ്. ഹൃദയം മിടിക്കാൻ പഴ്സ് ഉണ്ടാക്കുക എന്നത്. ഈ SA Node-ൽ ഉണ്ടാകുന്ന സിഗ്നൽ താഴോട്ട് വന്ന് Atrioventricular node (AV Node) എന്ന ഇടത്തിൽ എത്തുന്നു. വീണ്ടും ചിത്രം നോക്കുക. ഈ AV Node-ഉം പ്രത്യേക കോശങ്ങളാൽ ഉണ്ടായതും ഹൃദയത്തിന്റെ മധ്യഭാഗത്ത് സ്ഥിതി ചെയ്യുന്നതുമാണ്. ഈ AV Node-ൽ നിന്ന് പഴ്സ് താഴത്തെ അറകളായ വലത്-ഇടത് വെൻട്രിക്കിളുകളിൽ  എത്തുകയും അപ്പോൾ ഹൃദയം ചുരുങ്ങുകയും രക്തം പമ്പ് ചെയ്യപ്പെടുകയും ചെയ്യുന്നു. ഇപ്പോൾ എങ്ങനെയാണ് ഹൃദയം മിടിക്കുന്നത് എന്ന് മനസ്സിലായിരിക്കുമല്ലോ. 

എസ് എ നോഡിൽ നിന്ന്  ഏവി നോഡിൽ എത്തിയ ഇലക്‌ട്രിക്കൽ സിഗ്നൽ അഥവാ പഴ്സ് താഴത്തെ അറകളായ വെൻട്രിക്കിളുകളിൽ എത്താതെ ഭാഗികമായോ പൂർണ്ണമായോ തടസ്സപ്പെടുന്നതിനെയാണ് ഹാർട്ട് ബ്ലോക്ക് എന്ന് പറയുന്നത്. ഈ ബ്ലോക്കിനെ അതിന്റെ തീവ്രത അനുസരിച്ച് ഫസ്റ്റ്, സെക്കന്റ്, തേർഡ് എന്നിങ്ങനെ  മൂന്ന് ഡിഗ്രികളായി തിരിച്ചിട്ടുണ്ട്. ഫസ്റ്റ് ഡിഗ്രി ബ്ലോക്ക് നമ്മളിൽ ലക്ഷണങ്ങൾ ഒന്നും ഉണ്ടാക്കിയില്ല എന്ന് വരാം. ECG നോക്കിയാൽ മാത്രമേ മനസ്സിലാകൂ. രണ്ടാമത്തെ ഡിഗ്രി ബ്ലോക്കിൽ നെഞ്ച് വേദനയും മയക്കവും ശ്വാസതടസ്സവും എല്ലാം അനുഭവപ്പെട്ടേക്കാം. തേർഡ് ഡിഗ്രി ബ്ലോക്ക് അപകടകരവും പെട്ടെന്ന് തന്നെ ഡോക്ടരുടെ അടുത്തേക്ക് എത്തിക്കപ്പെടേണ്ടതും ആണ്. ഫസ്റ്റ് ഡിഗ്രി ബ്ലോക്കിന് പറയത്തക്ക ട്രീറ്റ്മെന്റ് ഒന്നും ആവശ്യമില്ലെങ്കിലും തേർഡ് ഡിഗ്രി ബ്ലോക്കിനു മരുന്നുകൾ കൊണ്ട് നിയന്ത്രണവിധേയമാകുന്നില്ലെങ്കിൽ കൃത്രിമമായി പേസ്‌മേക്കർ ഘടിപ്പിക്കേണ്ടി വരും. നേരിയ നെഞ്ച് വേദനയോ തല കറക്കമോ ഹാർട്ട് ബീറ്റ് കുറയുന്നതോ ആയി അനുഭവപ്പെട്ടാൽ ഡോക്ടറെ കാണുന്നതാണ് നല്ലത്. ഡോക്ടർ ECG പരിശോധിച്ചിട്ട് കൃത്യമായ ഉപദേശം തരും. ഡോക്ടർമാരെ വിശ്വസിക്കണം. നമ്മുടെ ആരോഗ്യത്തിന്റെ കാവൽ ദൈവങ്ങളാണ് ഡോക്ടർമാർ. എങ്കിലും നല്ല ഡോക്ടർമാരെ കണ്ടെത്താൻ ശ്രമിക്കണം എന്നും പറയാതെ വയ്യ. 

ഇനി രക്തധമനിയിൽ പ്ലേക്ക് (Plaques) അടിഞ്ഞു കൂടി അതറോസ്ക്ലിറോസ് (Atherosclerosis) എന്ന അവസ്ഥ ഉണ്ടായി ബ്ലോക്ക് ഉണ്ടാകുന്നതിനെ പറ്റി പറയാം. ഈ ബ്ലോക്ക് ഉണ്ടാകുന്നതിന്റെ കാരണങ്ങൾ ഇപ്പോഴും വിവാദത്തിലാണ്. രക്തത്തിൽ അധികം ഉണ്ടാകുന്ന കൊളസ്ട്രോൾ അടിഞ്ഞു കൂടിയിട്ടാണ് ബ്ലോക്ക് ഉണ്ടാകുന്നത് എന്നാണ് നമ്മുടെ നാട്ടിലെ ഡോക്ടർമാർ കരുതുന്നത്. ഇത് ഒരു ഹൈപ്പോതീസിസ് ആയിരുന്നു. ഒരു ഹൈപ്പോതീസിസ് ശരിയോ തെറ്റോ ആകാം. ചീത്ത കൊളസ്ട്രോൾ ആണ് അടിഞ്ഞുകൂടി പ്ലേക്ക് ഉണ്ടാക്കുന്നത് എന്ന ഹൈപ്പോതീസിസ് തെറ്റാണ് എന്ന് നിരവധി വിദേശ ഡോക്ടർമാർ കാര്യകാരണ സഹിതം വിശദീകരിച്ചിട്ടും നമ്മുടെ ഡോക്‌ടർമാർ ഇപ്പോഴും ആ പഴയ ഹൈപ്പോതീസിസിൽ പിടിച്ചു നിൽക്കുകയാണ്. 

ആ ഹൈപ്പോതീസീസ് തെറ്റാണെന്ന് പറയാനുള്ള ലോജിക്ക് ഇവയാണ്. ഒന്നാമത്തെ കാര്യം കൊളസ്ട്രോൾ നമ്മുടെ ശരീരത്തിന്റെ ജീവൽ പ്രവർത്തങ്ങൾക്ക് ഓക്സിജൻ പോലെ പ്രധാനമാണ്. പുതിയ കോശങ്ങൾ ഉണ്ടാകാൻ കൊളസ്ട്രോൾ അനിവാര്യമായ ഒരു ഘടകമാണ്. കൊളസ്ട്രോൾ ഒരു പ്രത്യേക കൊഴുപ്പ് ആണ്. സസ്യങ്ങളിൽ ഈ കൊഴുപ്പ് ഇല്ല. ജന്തുകോശങ്ങളിൽ മാത്രമേയുള്ളൂ. നല്ലതും ചീത്തയും എന്ന് രണ്ട് വിധം കൊളസ്ട്രോൾ ഇല്ല. കൊളസ്ട്രോൾ ഒന്നേയുള്ളൂ. HDL എന്നും  LDL എന്നും പറയുന്നത് കൊളസ്ട്രോൾ അല്ല. രക്തത്തിലൂടെ കൊളസ്ട്രോളിനെ വഹിച്ചുകൊണ്ട് പോകുന്ന പ്രോട്ടീൻ ആണ്   LDL-ഉം HDL-ഉം. അതായത്  LDL എന്ന പ്രോട്ടീൻ ആവരണം കൊളസ്ട്രോളിനെ രക്തം ഓരോ കോശങ്ങളിലും എത്തിക്കുന്നു. അധികം വരുന്ന കൊളസ്ട്രോളിനെ പുനരുപയോഗത്തിനു തിരിച്ച് ലിവറിൽ എത്തിക്കുന്ന പ്രോട്ടീൻ ആവരണം ആണ് HDL. അതിന്റെ അർത്ഥം കൊളസ്ട്രോൾ ഒരിക്കലും അധികമാകുന്നില്ല എന്നും അമൂല്യമായ ആ കൊഴുപ്പിനെ ഒട്ടും കളയാതെ സൂക്ഷിക്കുന്നു എന്നുമാണ്. 

ഏറ്റവും പ്രധാനപ്പെട്ട കാര്യം മാംസാഹാരങ്ങളിൽ നിന്ന് മാത്രമേ നമുക്ക് കൊളസ്ട്രോൾ കിട്ടുകയുള്ളൂ എന്നും അതും ആവശ്യമുള്ളതിന്റെ 25 ശതമാനം മാത്രമേ കഴിക്കുന്ന ഭക്ഷണത്തിൽ നിന്ന് കിട്ടുകയുള്ളൂ എന്നതാണ്. ആവശ്യമുള്ള കൊളസ്ട്രോളിന്റെ 75 ശതമാനവും നമ്മുടെ ലിവർ ആണ് മറ്റ് പോഷകങ്ങൾ ഉപയോഗിച്ച് ഉണ്ടാക്കുന്നത്. വെളിച്ചെണ്ണയിലൊക്കെ കൊളസ്ട്രോൾ ഉണ്ടെന്ന് പേടിക്കുന്നവർ ഇപ്പോഴും ഉണ്ട്. സസ്യകോശങ്ങൾക്ക് കോശഭിത്തി എന്നൊന്നിന്നില്ല. ജന്തുകോശങ്ങൾക്ക് കോശഭിത്തിയുണ്ട്. ജന്തുകോശങ്ങളുടെ ഭിത്തിയുടെ പ്രധാന നിർമ്മാണ ഘടകമാണ് കൊളസ്ട്രോൾ എന്ന കൊഴുപ്പ്. തലച്ചോറിന്റെ പ്രവർത്തനങ്ങൾക്കും സൂര്യപ്രകാശത്തിൽ ചർമ്മത്തിൽ വിറ്റാമിൻ ഡി ഉണ്ടാകാനും കൊളസ്ട്രോൾ വേണം. ചുരുക്കി പറഞ്ഞാൽ കൊളസ്ട്രോൾ ഒരിക്കലും അധികമാകുന്നില്ല. ആവശ്യാനുസരണം കൊളസ്ട്രോൾ ലിവർ ഉണ്ടാക്കുകയാണ് ചെയുന്നത്. 

അപ്പോൾ പിന്നെ എങ്ങനെയാണ് ധമനിയിൽ പ്ലേക്ക് രൂപപ്പെട്ട് രക്തയോട്ടം തടസ്സപ്പെട്ട് ആഞ്ചിയോ പ്ലാസ്റ്റ് ഒക്കെ ചെയ്യേണ്ടി വരുന്നത് എന്നല്ലേ? ധമനിയിൽ ഏതെങ്കിലും തരത്തിലുള്ള ഡാമേജ് ഉണ്ടാവുകയും അപ്പോൾ അവിടെ ഒരു വീക്കം അല്ലെങ്കിൽ ഇൻഫ്ലമേഷൻ ഉണ്ടാകുന്നതാണ് തുടക്കം. ആദ്യമൊക്കെ പ്രശ്നമുണ്ടാവുകയില്ല. പക്ഷെ ഡാമേജ് കൂടുതലാവുകയും ഇൻഫ്ലമേഷൻ തുടരുകയും ചെയ്താൽ കുറേ കോശങ്ങൾ നശിക്കാനിടയാകും. അപ്പോൾ ആ ഡാമേജ് പരിഹരിക്കാനും പുതിയ കോശങ്ങൾ നിർമ്മിക്കാനും ആവശ്യമായ പോഷകഘടകങ്ങൾ അവിടെ കേന്ദ്രീകരിക്കും. കൂട്ടത്തിൽ കൊളസ്ട്രോളും ഉണ്ടാകും. അതും വേണമല്ലൊ.  ശരീരത്തിനു പുറത്ത് എവിടെയെങ്കിലും ചെറിയൊരു മുറിവ് ഉണ്ടായാലും ഇതൊക്കെ തന്നെയാണ്  നടക്കുന്നത്. പുറത്തെ മുറിവ് ഉണങ്ങിയാൽ അവിടെ ഒരു പൊറ്റയുണ്ടാകും അല്ലേ? ആ പൊറ്റ പിന്നെ അടർന്ന് പോകും. പക്ഷെ ധമനിയിൽ അത് പ്ലാക്ക് ആയും അതറോസ്ക്ലിറോസ് ആയും മാറുന്നു. 

അതായത് ധമനിയിലെ ബ്ലോക്കിനു കാരണം ഡാമേജും ഇൻഫ്ലമേഷനും ആണ്.  ഡാമേജ് ഉണ്ടാകാനള്ള കാരണം അമിതമായ പുകവലിയും സ്ഥിരമായ മനസ്സിന്റെ പിരിമുറുക്കം ഒക്കെയാകാം. അതൊക്കെ വ്യക്തിഗതമാണ്. കൊളസ്ട്രോൾ വില്ലൻ അല്ല എന്നും നമ്മുടെ മിത്രം ആണെന്നും മേല്പറഞ്ഞതിൽ നിന്ന് മനസ്സിലാക്കാമല്ലൊ. ഹാർട്ട് സർജറികളെ പറ്റി മറ്റൊരു പോസ്റ്റിൽ എഴുതാം. 

വൃക്കരോഗം

വൃക്കരോഗം ബാധിച്ച്, ഡയാലിസിസോ അല്ലെങ്കിൽ കിഡ്നി ട്രാൻസ്പ്ലാന്റേഷനോ വേണ്ടി വരും എന്ന് ഡോക്ടർ നിർദ്ദേശിച്ച ഒരു പേഷ്യന്റിനെ നാട്ടുവൈദ്യന്റെ അടുത്ത് കൊണ്ടുപോയി പച്ചമരുന്ന് ചികിത്സ നടത്തിയപ്പോൾ രക്തത്തിലെ ക്രിയാറ്റിനിൻ കുറയുകയും പതിനൊന്ന് മാസത്തെ പച്ചമരുന്ന് ചികിത്സ കൊണ്ട് കിഡ്നി പൂർവ്വസ്ഥിതിയിൽ ആകുമെന്ന് ആ വൈദ്യൻ ഉറപ്പ് നൽകിയതായും ഇന്നലെ രാത്രി ഒരു സുഹൃത്ത് ഫോണിൽ സംസാരിക്കവേ പറഞ്ഞപ്പോൾ ഞാൻ പറഞ്ഞു, സുഹൃത്തേ ഒരാളുടെ കിഡ്നി ശരിക്കും ഡാമേജ് ആയിട്ടുണ്ടെങ്കിൽ അതൊരു ഫിസിക്കൽ ഡാമേജ് ആണ്. അപ്പോൾ രണ്ട് വഴികളേ ഉള്ളൂ ഒന്ന് പതിവായി ഡയാലിസിസ് ചെയ്യുക അല്ലെങ്കിൽ കിഡ്നി ട്രാൻസ്പ്ലാന്റ് ചെയ്യുക. അല്ലാതെ പച്ചമരുന്ന് കഴിച്ചാൽ കിഡ്നിയുടെ ഫിസിക്കൽ ഡാമേജ് പരിഹരിക്കപ്പെട്ട് പൂർവ്വസ്ഥിതിയിൽ ആകില്ല. മാത്രമല്ല ഡാമേജ് ആയ കിഡ്നി വൈദ്യൻ പറഞ്ഞത് പോലെ പച്ച മരുന്ന് കൊണ്ട് പതിനൊന്ന് മാസം പിടിച്ചു നിൽക്കുകയും ഇല്ല. അപ്പോൾ ആ സുഹൃത്ത് പറയുകയാണ് ഒരാളുടെ കിഡ്‌നി മറ്റൊരാൾക്ക് മേച്ച് ആകില്ലെന്നും കിഡ്‌നി മാറ്റി വെച്ച ആൾക്ക് പിന്നീട് നോർമൽ ലൈഫ് സാധ്യമല്ല എന്നും. എനിക്കപ്പോൾ ദ്വേഷ്യം വന്ന് ഞാൻ ഫോൺ സംഭാഷണം അവസാനിപ്പിച്ചു. കിഡ്‌നി ഫെയിലർ ആയിട്ടുണ്ടെങ്കിൽ പച്ച മരുന്ന് കഴിച്ച് കിഡ്നിയുടെ ആരോഗ്യം വീണ്ടെടുത്ത് നോർമൽ ലൈഫ് സാധ്യമാകും എന്ന് വിശ്വസിക്കുന്ന ആ സുഹൃത്തിന് വേണ്ടിയാണ് ഈ പോസ്റ്റ്.

നമ്മൂടെ ആമാശയത്തിന്റെ പിന്നിൽ നട്ടെല്ലിന്റെ ഇരുവശത്തുമായി പയർമണിയുടെ ആകൃതിയിൽ മുഷ്ടിയോളം വലിപ്പത്തിൽ സ്ഥിതി ചെയ്യുന്നതാണല്ലൊ വൃക്കകൾ അഥവാ കിഡ്‌നികൾ. ഒരാൾക്ക് ആരോഗ്യത്തോടെ ജീവിയ്ക്കാൻ ഒരു കിഡ്‌നി മതി. അതുകൊണ്ടാണ് രണ്ട് കിഡ്‌നിയും ഫെയിലർ ആയ ഒരാൾക്ക് അതേ രക്തഗ്രൂപ്പിൽ പെട്ട മറ്റൊരാൾക്ക് ഒരു വൃക്ക ദാനം ചെയ്യാനും രണ്ട് പേർക്കും പിന്നീട് ആരോഗ്യത്തോടെ ജീവിയ്ക്കാനും സാധിക്കുന്നത്. ഈ സത്യം ആളുകളിൽ പ്രചരിപ്പിക്കാനാണ് കൊച്ചൗസേപ്പ് ചിറ്റിലപ്പള്ളി എന്ന വ്യവസായി തന്റെ ഒരു കിഡ്‌നി ദാനം ചെയ്തത്. പക്ഷെ ആ ഒരു സന്ദേശമല്ല ആളുകളിൽ എത്തിയത്, നേരേ മറിച്ച് ആരാണ് ഈ ക്രിയാറ്റിനിൻ ലവൽ തീരുമാനിക്കുന്നത് എന്നും അങ്ങനെ ടെസ്റ്റ് ചെയ്യാനേ പാടില്ല എന്നും മോഡേൺ മെഡിസിൻ ആണ് വൃക്കകൾ തകരാറിലാക്കുന്നത് എന്നും പച്ചമരുന്നാണ് പ്രതിവിധി എന്നുമുള്ള മോഹനൻ വൈദ്യരുടെ വാദമാണ് പരക്കെ ഷെയർ ചെയ്യപ്പെടുന്നത്.

ഉപാപചയ പ്രവർത്തനങ്ങളുടെ ഫലമായി രക്തത്തിൽ രൂപപ്പെടുന്ന പല തരത്തിലുള്ള മാലിന്യങ്ങളെ അരിച്ച് മൂത്രത്തിലൂടെ പുറന്തള്ളുന്നതാണ് കിഡ്‌നിയുടെ പ്രധാന ജോലി. അത്തരം മാലിന്യങ്ങളിൽ ഒന്നാണ് ക്രിയാറ്റിനിൻ. നമ്മുടെ ശരീരം ഉണ്ടാക്കുന്ന ഒരു പ്രോട്ടീൻ ആണ് ക്രിയാറ്റിൻ. ആ ക്രിയാറ്റിന്റെ ചെറിയൊരു ഭാഗം ശാരീരീക പ്രവർത്തനങ്ങളുടെ ഫലമായി ക്രിയാറ്റിനിൻ എന്ന വേസ്റ്റ് ആയി മാറുന്നു. അതുകൊണ്ടാണ് അനുവദനീയമായ ലവലിൽ അധികം ക്രിയാറ്റിനിൻ രക്തത്തിൽ കാണുമ്പോൾ വൃക്കകൾക്ക് തകരാറ് തുടങ്ങുന്നു എന്ന് പറയുന്നത്. എന്നാൽ ഒരാളുടെ വൃക്കകൾ പൂർണ്ണമായും തകരാറിലായോ എന്ന് തീരുമാനിക്കാൻ ക്രിയാറ്റിനിൻ ടെസ്റ്റ് കൊണ്ട് മാത്രം കഴിയില്ല. അതിനു ACR (Albumin to Creatinine Ratio) എന്ന മൂത്രപരിശോധനയും GFR (glomerular filtration rate) എന്ന രക്തപരിശോധനയും കൂടി നടത്തേണ്ടതുണ്ട്.

ഇതിനിടയിൽ എന്താണ് ദഹനവും ഉപാപചയവും (Digestion and Metabolism) തമ്മിലുള്ള വ്യത്യാസം എന്ന് നിങ്ങൾ ശരിക്ക് മനസ്സിലാക്കണം. ദഹനം എന്ന് പറയുന്നത് നമ്മൾ കഴിക്കുന്ന ഭക്ഷണം വായ മുതൽ ആമാശയം, ചെറുകുടൽ, വൻകുടൽ വരെ അന്നനാളത്തിലൂടെ നീങ്ങുമ്പോൾ വിവിധ എൻസൈമുകളുടെ സമ്പർക്കത്തിൽ ലഘുഘടകങ്ങളായി വിഘടക്കപ്പെടുന്നതാണ്. അപ്രകാരം ആഹാരത്തിലെ പ്രോട്ടീൻ അമിനോ ആസിഡുകളായും , സ്റ്റാർച്ച് ഗ്ലൂക്കോസ് ആയും കൊഴുപ്പ് ഫാറ്റി ആസിഡുകളായും വിഘടിക്കപ്പെടുന്നു. എന്നിട്ട് മാത്രമാണ് ഇവ ചെറുകുടലിലെ നേരിയ സുഷിരങ്ങളിൽ കൂടി രക്തത്തിൽ പ്രവേശിക്കുന്നത്. ഈ അന്നനാളം എന്ന് പറയുന്നത് ശരിക്ക് പറഞ്ഞാൽ ശരീരത്തിന്റെ അകം അല്ല. ശരീരത്തിനകത്ത് വായ മുതൽ ഗുദം വരെ നീളുന്ന ഒരു ചുരുളൻ കുഴൽ ആണ് അന്നനാളം. അതുകൊണ്ട് നമ്മൾ കഴിക്കുന്ന ആഹാരം അതേ പടി ശരീരത്തിനകത്ത് പ്രവേശിക്കുന്നില്ല. മേൽപ്പറഞ്ഞത് പോലെ വിഘടിക്കപ്പെട്ട ലഘുതന്മാത്രകളാണ് ചെറുകുടലിലെ സുഷിരങ്ങളിലൂടെ രക്തത്തിൽ പ്രവേശിക്കുന്നത്. അപ്പോൾ മാത്രമാണ് ആഹാരത്തിലെ പോഷകഘടകങ്ങൾ ശരീരത്തിനകത്ത് പ്രവേശിപ്പിച്ചതായി പറയാൻ പറ്റുക. അതിന്റെ അർത്ഥം ആഹാരത്തിലെ പ്രോട്ടീനും സ്റ്റാർച്ചും കൊഴുപ്പും ഒന്നും അതേ പടി അകത്ത് കയറിക്കൂട എന്നാണ്.

ഇനി എന്താണ് ഉപാപചയം എന്ന് ചോദിച്ചാൽ, രക്തത്തിൽ പ്രവേശിച്ച പോഷകങ്ങൾ ലിവറിലൂടെ കടന്ന് ഓരോ കോശങ്ങളിലേക്കും രക്തം തന്നെ വഹിച്ചുകൊണ്ടുപോയി എത്തിക്കുന്നു. അങ്ങനെ കോശങ്ങളിൽ വെച്ച് പോഷകങ്ങൾ പലവിധ രാസപ്രവർത്തനങ്ങൾക്ക് വിധേയമാകുന്നു. ഉദാഹരണത്തിനു അമിനോ ആസിഡുകൾ കൊണ്ട്  നമുക്ക് വേണ്ട പ്രോട്ടീനുകൾ ഉണ്ടാക്കുന്നു. ഗ്ലൂക്കോസ് വിഘടിപ്പിച്ച് ഊർജ്ജം ഉണ്ടാക്കുന്നു. ഇങ്ങനെയുള്ള രാസപ്രവർത്തനങ്ങളുടെ ഫലമായി കുറെ മാലിന്യങ്ങൾ ഉണ്ടാകുന്നു. അതൊക്കെ പുറത്തേക്ക് കളയുന്നത് കിഡ്‌നികളാണ്. ഭക്ഷണത്തിൽ കൂടി ലഭിക്കുന്നവയിൽ ശരീരം സ്റ്റോർ ചെയ്യാത്ത അധിക പോഷകങ്ങളും രക്തത്തിൽ നിന്ന് കിഡ്‌നികൾ നീക്കം ചെയ്യേണ്ടതുണ്ട്. ഉദാഹരണത്തിനു അധികം പ്രോട്ടീൻ കഴിച്ചാൽ ശരീരം അത് സ്റ്റോർ ചെയ്യില്ല. എന്നാൽ സ്റ്റാർച്ച് അധികം കഴിച്ചാൽ അതിനെ കൊഴുപ്പാക്കി മാറ്റി സ്റ്റോർ ചെയ്യും.

Diabetic nephropathy, Kidney stones, Kidney infections, Renal failure, Kidney hydronephrosis, Duplicated ureter, Interstitial nephritis, Kidney tumor, Nephrotic syndrome ഇവയൊക്കെ കിഡ്‌നിയെ ബാധിക്കുന്ന അസുഖങ്ങളാണ്. വിസ്താരഭയത്താൽ ഇതിനെ പറ്റിയൊന്നും ഇവിടെ വിശദീകരിക്കുന്നില്ല. അതിന്റെ ആവശ്യവും ഇല്ല. ബന്ധപ്പെട്ട ഡോക്ടർമാരെ കൺസൽട്ട് ചെയ്യുകയാണ് വേണ്ടത്. ഇതൊക്കെ ആയുർവേദ-നാട്ടുവൈദ്യനു കണ്ടെത്താനോ ചികിത്സിക്കാനോ കഴിയുമോ? പച്ച മരുന്നു എന്നൊരു മരുന്നില്ല. സസ്യങ്ങളുടെ ഇലയും വേരും തണ്ടും തൊലിയും പൂവും കായും ഒക്കെ നമുക്ക് റോ മെറ്റീരിയൽസ് ആണ്. രോഗവും മരുന്നും ചികിത്സയും ഒക്കെ സയന്റിഫിക്ക് ആയി പരീക്ഷിച്ചും ഗവേഷണം നടത്തിയും ഒക്കെ കണ്ടെത്തണം. അതാണ് മോഡേൺ മെഡിസിൻ എന്ന് പറയുന്നത്. ഒരു നൂറ് വർഷത്തിനിപ്പുറം ആണ് ഈ കണ്ടെത്തലുകൾ വികസിച്ചതും രോഗങ്ങൾ മിക്കതും ചികിത്സിച്ച് ഭേദമാക്കാം എന്ന നില വന്നതും. മോഡേൺ മെഡിസിനിൽ മാത്രമേ യഥാർത്ഥ ചികിത്സയും മരുന്നുകളും ഉള്ളൂ. ബാക്കിയെല്ലാം വിശ്വാസങ്ങളോ തട്ടിപ്പുകളോ വ്യാജമോ ആണ്. മോഡേൺ മെഡിസിൻ പണത്തിനു വേണ്ടി ദുരുപയോഗം ചെയ്യുന്ന വൻ ആസ്പത്രികളോ ഡോക്ടർമാരോ ഉണ്ടായേക്കാം. അതൊന്നും മോഡേൺ മെഡിസിന്റെ കുറ്റം അല്ല. നമ്മൾ ശരിയായ ആസ്പത്രിയും ഡോക്ടർമാരെയും കണ്ടെത്തുകയാണ് വേണ്ടത്. അത് അത്ര പ്രയാസമുള്ള കാര്യവുമല്ല. 

ചന്ദ്രയാൻ-2

ചന്ദ്രയാൻ-2 ന്റെ വിക്ഷേപണം മഹാവിജയമാക്കിയ ശാസ്ത്രഗരിമയിൽ നമ്മൾ അഭിമാനിക്കുമ്പോൾ ഈ നേട്ടങ്ങൾക്ക് നാം നന്ദി പറയേണ്ടത് സ്വാതന്ത്യ്രപ്രാപ്തിക്ക് ശേഷം ഈ രംഗത്തേക്ക് ആദ്യചുവടുകൾ വെച്ച അന്നത്തെ ഭരണാധികാരികളോടും വിക്രം സാരാഭായ് അടക്കമുള്ള ശാസ്ത്രഗവേഷണ രംഗത്തെ പ്രതിഭകളോടും ആണ്. രാജ്യത്തിന്റെ പുരോഗതി എന്നത് സ്വാതന്ത്ര്യാനന്തരം നടന്നുവരുന്ന ഒരു തുടർച്ചയാണ്. ഇടയിൽ വരുന്ന ആർക്കെങ്കിലും മാത്രം അതിന്റെ ഖ്യാതി ചാർത്തിക്കൊടുക്കുന്നത് മനുഷ്യർക്ക് ചേരാത്ത നന്ദികേടാണെന്ന് പറയുക മാത്രമല്ല അത്തരത്തിൽ നന്ദികെട്ട മനസ്സ് എന്തിനാണ് വെച്ചുപുലർത്തുന്നത് എന്ന് ചോദിക്കേണ്ടിയും വരുന്നു. നല്ല മനസ്സാണ് നമ്മൾ ജീവിതത്തിൽ കാത്തുസൂക്ഷിക്കേണ്ടത്.

ചന്ദ്രയാൻ-2 ന്റെ പ്രധാന ദൗത്യം ചന്ദ്രന്റെ ദക്ഷിണ ധ്രുവത്തിൽ ഹീലിയം-3 ന്റെ നിക്ഷേപത്തിന്റെ സാന്നിധ്യവും അളവും പഠിക്കുക എന്നതാണ്. ഭാവിയിൽ ആണവോർജ്ജം ഉല്പാദിപ്പിക്കാനുള്ള ഇന്ധനമായി ഹീലിയം-3 ചന്ദ്രനിൽ നിന്ന് ഭൂമിയിലേക്ക് കൊണ്ടുവരിക എന്നതാണ് നമ്മുടെ ആത്യന്തികമായ ലക്ഷ്യം. അതിലേക്കുള്ള ആദ്യപടിയാണ് ഈ വിക്ഷേപണ വിജയത്തോടെ നമ്മൾ കയറിയിട്ടുള്ളത്.

നിലവിൽ നമ്മുടെ ആണവനിലയങ്ങൾ പ്രവർത്തിക്കുന്നത് യുറേനിയം എന്ന മൂലകത്തിന്റെ ന്യൂക്ലിയസ്സിലേക്ക് ന്യൂട്രോണുകൾ അടിച്ചു കയറ്റി ആ മൂലകത്തെ പിളർത്തി, അപ്പോൾ പുറത്ത് വരുന്ന താപോർജ്ജം കൊണ്ട് ജലം ചൂടായി നീരാവിയുണ്ടാവുകയും ആ നീരാവിയുടെ ശക്തിയിൽ ടർബൈൻ കറങ്ങുകയും അങ്ങനെ വിദ്യുഛക്തി ഉല്പാദിപ്പിക്കുകയും ചെയ്യുക എന്നതാണ്. ഈ രീതിയിൽ പ്രവർത്തിക്കുന്ന ആണവറിയാക്ടറുകളെ Nuclear fission reactors എന്ന് പറയുന്നു. ഫിഷൻ എന്ന് വെച്ചാൽ വിഘടിപ്പിക്കുക അല്ലെങ്കിൽ പിളർത്തുക എന്നതാണ്. കൂടംകുളത്തും പ്രവർത്തിക്കുന്നത് ഇതേ മാതിരി റിയാക്ടർ ആണ്.  യുറേനിയം എന്നത് 92-ആമത്തെ മൂലകം ആണ്. അത് പിളർക്കുമ്പോൾ ഊർജ്ജം ലഭിക്കുമെങ്കിലും അതിൽ നിന്ന് റേഡിയോ ആക്റ്റീവ് വികിരണങ്ങളും ഉണ്ടാകുന്നു. ഇങ്ങനെയുണ്ടാകുന്ന റേഡിയോ ആക്റ്റീവ് വികിരണങ്ങൾ ഉള്ള പദാർത്ഥങ്ങളെയാണ് നാം ആണവമാലിന്യങ്ങൾ എന്ന് പറയുന്നത്. ഈ ആണവമാലിന്യങ്ങളിൽ നിന്ന് ആണവവികിരണങ്ങൾ പുറത്ത് വരാതെ സൂക്ഷിക്കുക എന്നത് വളരെ ചെലവേറിയതും റിസ്ക് ഉള്ളതുമായ ഏർപ്പാടാണ്. അവിടെയാണ് ഹീലിയം-3 ന്റെ പ്രസക്തി.

മൂലകങ്ങളെ ഒന്ന് മുതൽ 92 വരെ അതായത് ഹൈഡ്രജൻ മുതൽ യുറേനിയം വരെ അണുസംഖ്യയുടെ അടിസ്ഥാനത്തിൽ വേർതിരിക്കുന്നതിന്റെ കാരണം നിങ്ങൾ പഠിച്ചിരിക്കും. മൂലകത്തിൽ എത്ര പ്രോട്ടോൺ ഉണ്ടോ അതാണ് അതിന്റെ അണു സഖ്യ. ഹൈഡ്രജനിൽ ഒരു പ്രോട്ടോൺ ആണുള്ളത്. അതുകൊണ്ടാണ് ഹൈഡ്രജൻ ഒന്നാമത്തെ മൂലകം ആകുന്നത്. യുറേനിയം മൂലകത്തിൽ 92 പ്രോട്ടോൺ ഉണ്ട്. അതുകൊണ്ടാണ് യുറേനിയത്തിന്റെ അണുസംഖ്യ 92 ആകുന്നത്. ഹൈഡ്രജൻ കഴിഞ്ഞാൽ രണ്ടാമത്തെ മൂലകം ആണ് ഹീലിയം എന്നും അതിന്റെ അണുസംഖ്യ 2 ആണെന്നും നിങ്ങൾക്കറിയാം.

എന്നാൽ എന്താണ് ഹീലിയം-3 ? ഏതൊരു അണുവിന്റെയും കേന്ദ്രത്തിൽ പ്രോട്ടോണും ന്യൂട്രോണും ഉണ്ടാകും. പ്രോട്ടോണും ന്യൂട്രോണും അടങ്ങിയ അണുകേന്ദ്രവും അതിനെ ചുറ്റുന്ന എലക്ടോണുകളും ചേർന്നതാണ് ഒരു മൂലകം. പ്രോട്ടോണിനു പോസിറ്റിവ് ചാർജ്ജ് ആയത് കൊണ്ട് ഒരു മൂലകത്തിൽ എത്ര പ്രോട്ടോൺ ഉണ്ടോ അത്രയും എലക്ട്രോണുകളും ഉണ്ടാകും. അതായത് ഏത് മൂലകത്തിലും പ്രോട്ടോണിന്റെയും എലക്ട്രോണിന്റെയും എണ്ണം തുല്യമായിരിക്കും. എലക്ടോണിനു നെഗറ്റീവ് ചാർജ്ജ് ആണ്. അങ്ങനെയാണ് ഏത് ഒരു ആറ്റവും ന്യൂട്രൽ ആകുന്നത്. അതേ സമയം അണുവിന്റെ കേന്ദ്രത്തിൽ ന്യൂട്രോണും ഉണ്ടെങ്കിലും അതിനു ചാർജ്ജ് ഇല്ലാത്തത് കൊണ്ട് പല മൂലകങ്ങളിലും പ്രോട്ടോണിന്റെ എണ്ണത്തിനു തുല്യമല്ല ന്യൂട്രോണുകളുടെ എണ്ണം. എങ്കിലും പൊതുവെ പ്രോട്ടോന്റെയും ന്യൂട്രോണിന്റെയും എണ്ണം തുല്യമായിരിക്കുകയും ചെയ്യും.  പ്രോട്ടോണും ന്യൂട്രോണും ആകെ എത്രയുണ്ടോ അതാണ് ഒരു മൂലകത്തിന്റെ അണുഭാരം എന്നത്.

ഒന്നാമത്തെ മൂലകം ആയ ഹൈഡ്രജനിൽ ഒരു പ്രോട്ടോണും ഒരു എലക്ട്രോണും മാത്രമേയുള്ളൂ. അതുകൊണ്ട് ഹൈഡ്രജന്റെ അണുസംഖ്യയും അണുഭാരവും ഒന്ന് ആണ്. കാരണം അതിൽ ന്യൂട്രോൺ ഇല്ലല്ലൊ. എന്നാൽ ഒരു ന്യൂട്രോണും രണ്ട് ന്യൂട്രോണും ഉള്ള സ്വാഭാവികമല്ലാത്ത ഹൈഡ്രജനുമുണ്ട്. അത്തരം ഹൈഡ്രജനുകളെ ഹൈഡ്രജൻ ഐസോടോപ്പുകൾ എന്ന് പറയുന്നു. ഹീലിയം മുതലുള്ള സ്വാഭാവിക മൂലകങ്ങളിലാണ്  ന്യൂട്രോണുകൾ ഉള്ളത്. ഒരു ഹീലിയം അണുവിൽ രണ്ട് പ്രോട്ടോണും രണ്ട് ന്യൂട്രോണും രണ്ട് എലക്ട്രോണും ഉണ്ടാകും. അതായത് ഹീലിയം മൂലകത്തിന്റെ അണുഭാരം 4 (2പ്രോട്ടോൺ+2ന്യൂട്രോൺ) ആണ് എലക്ട്രോണുകൾക്ക് ഭാരം ഇല്ല എന്ന് ഓർക്കുമല്ലൊ. ഇങ്ങനെയുള്ള ഹീലിയം ഒരു വാതകം ആണ്. ഈ വാതകം ആണ് ഹീലിയം ബലൂണുകളിൽ നിറച്ചിരിക്കുന്നത്.

ഹീലിയം-3 എന്നത് അതിന്റെ കേന്ദ്രത്തിൽ രണ്ട് പ്രോട്ടോണും ഒരു ന്യൂട്രോണും മാത്രമുള്ള ഐസോടോപ്പ് ആണ്. അതായത് സാധാരണ ഗതിയിൽ ഉണ്ടാകേണ്ട രണ്ട് ന്യൂട്രോണിനു പകരം ഒരു ന്യൂട്രോൺ മാത്രം. ഇങ്ങനെ ന്യൂട്രോണുകളുടെ എണ്ണം കുറയുകയോ കൂടുകയോ ചെയ്യുന്ന മൂലകങ്ങളെയാണ് ഐസോടോപ്പുകൾ എന്ന് പറയുന്നത്. പൊതുവെ ഐസോടോപ്പുകൾ ആണവവികിരണങ്ങൾ പുറപ്പെടുവിച്ചുകൊണ്ടേയിരിക്കും. എന്നാൽ ഹീലിയം-3 ഐസോടോപ്പ് ആണവകിരണങ്ങൾ പുറപ്പെടുവിക്കുന്നില്ല. അതൊരു സ്റ്റേബിൾ ഐസോടോപ്പ് ആണ്.

ഹീലിയം-3 ആണവ ഇന്ധനം ആയി ഉപയോഗിക്കുമ്പോൾ അത്തരം ആണവനിലയങ്ങളെ Nuclear fusion reactors എന്നാണ് പറയുക. ഫ്യൂഷൻ എന്ന് വെച്ചാൽ സംയോജിപ്പിക്കുക എന്നാണ് അർത്ഥം. ഇത്തരം റിയാക്ടറുകളിൽ നിന്ന് വൈദ്യുതി ഉല്പാദിപ്പിക്കുമ്പോൾ ഒട്ടും ആണവമാലിന്യങ്ങൾ ഉണ്ടാവുകയില്ല എന്നത് കൊണ്ട് ഇതിനെ ക്ലീൻ എനർജി എന്ന് പറയാം. ഇങ്ങനെയുള്ള റിയാക്ടറുകളിൽ ആദ്യം ഹീലിയം-3 ഐസോടോപ്പും  ഡ്യൂട്ടീരിയം എന്ന ഹൈഡ്രജൻ ഐസോടോപ്പും സംയോജിപ്പിച്ചുകൊണ്ട് ഊർജ്ജോല്പാദനം നടത്തും. രണ്ടാം ഘട്ടമായി രണ്ട് ഹീലിയം-3 ഐസോടോപ്പുകൾ സംയോജിപ്പിക്കും.

ഭൂമിയിൽ വളരെ തുച്ഛമായി ഹീലിയം-3 ഉണ്ട്. പക്ഷെ ചന്ദ്രനിൽ വളരെ വലിയ തോതിൽ എന്ന് വെച്ചാൽ ഭൂമിയിൽ എത്രയോ നൂറ്റാണ്ടുകൾ വൈദ്യുതോർജ്ജം ഉല്പാദിപ്പിക്കാൻ ആവശ്യമായ വൻ നിക്ഷേപം ഉണ്ട് എന്ന് കണ്ടെത്തിയിട്ടുണ്ട്. സൂര്യനിൽ നിന്ന് പ്രവഹിക്കുന്ന സൂര്യക്കാറ്റിലാണ് ഹീലിയം-3 ചന്ദ്രനിൽ നിക്ഷേപിക്കപ്പെടുന്നത്. ഭൂമിയുടെ കാന്തികവലയം തടുക്കുന്നത് കൊണ്ടാണ് ഹീലിയം-3 ഭൂമിയിൽ നിക്ഷേപിക്കപ്പെടാത്തത്. സൂര്യന്റെ അന്തരീക്ഷത്തിൽ നിന്നുൽഭവിക്കുന്ന ചാർജ്ജുള്ള കണികകളുടെ പ്രവാഹമാണ് സൂര്യക്കാറ്റ് അഥവാ സൗരവാതം. ഈ പ്രവാഹത്തിൽ കൂടുതലായും ഇലക്ട്രോണുകളും പ്രോട്ടോണുകളുമായിരിക്കും ഉണ്ടാവുക. സൂര്യനിൽ നടക്കുന്നത് രണ്ട് ഹൈഡ്രജൻ മൂലകങ്ങൾ സംയോജിച്ച് ഹീലിയം-4 ആകുന്ന പ്രക്രിയ ആണെന്ന് ഓർക്കുക. കൂട്ടത്തിൽ ഹീലിയം-3 എന്ന ഐസോടോപ്പും ഉണ്ടാകുന്നു.

ചന്ദ്രനിൽ നിന്ന് ഹീലിയം-3 ഇന്ത്യയിലേക്ക് കടത്തിക്കൊണ്ടുവരുന്ന കാലം വിദൂരമല്ല എന്നാണ് ചാന്ദ്രയാൻ-2ന്റെ വിജയകരമായ വിക്ഷേപണം തെളിയിക്കുന്നത്. ഇതിൽ നാം എല്ലാ ഇന്ത്യക്കാർക്കും അഭിമാനിക്കാം.

എന്താണ് ശരീരം?

എന്താണോ നിങ്ങൾ തിന്നുന്നത് അതാണ് നിങ്ങൾ എന്ന് പറയാറുണ്ട്. അതായത് നമ്മൾ കഴിക്കുന്ന ആഹാരം തന്നെയാണ് നമ്മുടെ ശരീരം എന്ന് ചുരുക്കം.  ഒരു ശിശു ജനിക്കുമ്പോൾ ശരാശരി 2.5 കിലോഗ്രാം ഭാരം ആണ് ഉണ്ടാവുക. പിന്നെ വളർന്ന് ഭാരം വർദ്ധിക്കുന്നത് ഭക്ഷണം കഴിച്ചിട്ടാണല്ലൊ. ജനിക്കുമ്പോഴുള്ള ഭാരം തന്നെ മാതാവ് കഴിച്ച ഭക്ഷണമാണ് എന്നും മനസ്സിലാക്കാവുന്നതേയുള്ളൂ. കാരണം ഒരു ഭ്രൂണം വളർന്ന് 8 ആഴ്ച ആകുമ്പോൾ ഭാരം 1 ഗ്രാം മാത്രമാണ്. അപ്പോൾ എന്താണ് ശരീരം എന്ന് ചോദിച്ചാൽ ഭക്ഷണപദാർത്ഥങ്ങളാണ് ശരീരം എന്ന് പറയാം. ഭക്ഷണപദാർത്ഥങ്ങൾ എന്താണെന്ന് ചോദിച്ചാൽ മണ്ണിൽ നിന്നാണ് ഭക്ഷണം കിട്ടുന്നത് എന്ന് പറയാം. പാലോ മാംസമോ കഴിച്ചാലും ആത്യന്തികമായി മണ്ണിൽ നിന്ന് ലഭിക്കുന്ന പദാർത്ഥങ്ങളാണ് പാലായും മാംസമായും മാറുന്നത് എന്നു മനസ്സിലാക്കാം.

നമ്മുടെ ശരീരത്തിൽ ഉള്ളത് അറുപതോളം കെമിക്കൽ മൂലകങ്ങളാണ് എന്ന് പറയുമ്പോൾ എന്താണ് ജൈവം എന്നതും രാസം എന്നതും തമ്മിലുള്ള വ്യത്യാസം എന്ന് നിങ്ങൾക്ക് തോന്നാം. ഒരു വ്യത്യാസവും ഇല്ല എന്നതാണ് വസ്തുത. ജീവൻ ഉള്ളതും ഇല്ലാത്തതും എല്ലാം കെമിക്കൽ മൂലകങ്ങൾ കൊണ്ടാണ് ഉണ്ടായിട്ടുള്ളത്. അതായത് പ്രകൃതിയിൽ ജൈവം എന്നും രാസം എന്നും രണ്ട് തരം പദാർത്ഥങ്ങൾ ഇല്ല. ജീവൻ ഇല്ലാത്ത കെമിക്കൽ മൂലകങ്ങൾ കൊണ്ടാണ് ജീവൻ ഉള്ളവയും ഉണ്ടായിട്ടുള്ളത്. പ്രകൃതിയിൽ 92 തരം മൂലകങ്ങൾ മാത്രമേയുള്ളൂ. പീരിയോഡിക്ക് ടേബിളിൽ 118 മൂലകങ്ങൾ കാണും. 92ന് ശേഷം വരുന്ന മൂലകങ്ങൾ ലബോറട്ടറിയിൽ ഉണ്ടാക്കുന്നതാണ്. എന്തായാലും ഒന്നാമത്തെ മൂലകം ആയ ഹൈഡ്രജൻ മുതൽ തൊണ്ണൂറ്റിരണ്ടാമത്തെ യുറേനിയം വരെ മാത്രമേ പ്രകൃതിയിൽ നിലനിൽന്നുള്ളൂ എന്ന് സാമാന്യമായി പറയാം.

ഈ 92 മൂലകങ്ങൾ കൊണ്ടാണ് ഈ പ്രപഞ്ചവും പ്രപഞ്ചത്തിലെ സർവ്വചരാചരങ്ങളും ഉണ്ടായിട്ടുള്ളത് എന്ന് നമ്മൾ അംഗീകരിച്ചേ മതിയാവൂ. ഇക്കാണുന്ന നക്ഷത്രങ്ങളും ഗ്രഹങ്ങളും ജീവജാലങ്ങളും എല്ലാം തന്നെ ഈ 92 മൂലകങ്ങളിൽ അടങ്ങും. എന്താണ് ജീവൻ എന്ന് ചോദിച്ചാലും ഈ 92ൽ അറുപതോളം മൂലകങ്ങളുടെ രാസപ്രവർത്തനങ്ങളുടെ ഫലം ആണ് ജീവൻ എന്ന് മാത്രമേ പറയാൻ പറ്റൂ. ശരീരത്തിൽ രാസപ്രവർത്താനം ഇല്ലെങ്കിൽ ജീവൻ ഇല്ല. ജീവൻ നിലനിർത്തുന്ന പ്രധാന രാസപ്രവർത്തനം ഗ്ലൂക്കോസ് എന്ന തന്മാത്ര ഓരോ കോശങ്ങളിലും വെച്ച് ശ്വസിക്കുന്ന വായുവിലെ ഓക്സിജനുമായി ചേർന്ന് ‘കത്തൽ’ എന്ന പ്രക്രിയയാണ്.

കാർബൺ, ഓക്സിജൻ, ഹൈഡ്രജൻ എന്നിങ്ങനെ മൂന്ന് മൂലകങ്ങൾ ചേർന്ന തന്മാത്രയാണ് ഗ്ലൂക്കോസ്. സസ്യങ്ങളാണ് ഗ്ലൂക്കോസ് നിർമ്മിച്ചത്. സസ്യങ്ങൾ കാർബണും ഓക്സിജനും ഹൈഡ്രജനും നിർമ്മിക്കാൻ സൗരോർജ്ജം ഉപയോഗിച്ചിട്ടുണ്ട്. ആ സൗരോർജ്ജം തന്മാത്രോർജ്ജം ആയി ഗ്ലൂക്കോസിൽ ഉണ്ട്. വായുവിലെ ഓക്സിജൻ എന്ന് പറയുന്നത് രണ്ട് ഓക്സിജൻ മൂലകങ്ങൾ ചേർന്ന തന്മാത്രയാണ്. ആ ഓക്സിജനും ഗ്ലൂക്കോസും ചേർന്ന് കോശങ്ങളിൽ വെച്ച് കത്തുമ്പോൾ വെളിപ്പെടുന്ന ഊർജ്ജം ആണ് ജീവൻ എന്ന പ്രവർത്തനത്തെ നിലനിർത്തുന്നത്.

നമ്മുടെ ശരീരഭാരത്തിൽ 65% ഓക്സിജനും, 18% കാർബണും, 10% ഹൈഡ്രജനും, 3% നൈട്രജനും, 1.5% കാൽസിയവും, 1% ഫോസ്‌ഫറസും  0.35% പൊട്ടാസിയവും, പിന്നെ സോഡിയം, ഇരുമ്പ്, സൽഫർ, മെഗ്‌നീഷ്യം, ക്ലോറിൻ സിങ്ക് മുതലായ മൂലകങ്ങൾ എല്ലാം കൂടി 1ശതമാനവും ആണുള്ളത് . മൂലകങ്ങളുടെ കണക്കാണ് ഏകദേശമായി പറഞ്ഞത്. നേരിയ വ്യത്യാസങ്ങൾ വരാം. ഈ മൂലകങ്ങൾ ചേർന്ന് തന്മാത്രകളും തന്മാത്രകൾ ചേർന്ന് കോശങ്ങളും കോശങ്ങൾ ചേർന്ന് ടിഷ്യൂകളും ടിഷ്യൂകൾ ചേർന്ന് അവയയവങ്ങളും അവയങ്ങൾ ചേർന്ന് ശരീരവും ഉണ്ടാകുന്നു.

ഉദാഹരണത്തിനു ഓക്സിജനും ഹൈഡ്രജനും ചേർന്ന ജലം ആണ് ശരീരഭാരത്തിന്റെ 62 ശതമാനവും ഉള്ളത്. അത് പോലെ ഓക്സിജനും കാർബണും ഹൈഡ്രജനും ചേർന്ന ഫേറ്റ് 16ശതമാനവും, ഓക്സിജനും നൈട്രജനും ഹൈഡ്രജനും കാർബണും ചേർന്ന പ്രോട്ടീൻ 16ശതമാനവും 1ശതമാനം കാർബോഹൈഡ്രേറ്റും 5 ശതമാനം മിനറൽസും ശരീരത്തിൽ ഉണ്ട്. ശരീരത്തിൽ ജീവന്റെ പ്രവർത്തനം നിലയ്ക്കുമ്പോൾ ഇപ്പറഞ്ഞ മൂലകങ്ങൾ വീണ്ടും പ്രകൃതിയുടെ ഭാഗം ആവുകയാണ്.

അപ്പോൾ നമ്മുടെ ശരീരം എന്നത് മുൻപ് പ്രകൃതിയിൽ ഉള്ള മൂലകങ്ങൾ തന്നെയാണ്. ഇതേ മൂലകങ്ങൾ വീണ്ടും പ്രകൃതിയിൽ ലയിച്ച് പിന്നെയും സസ്യങ്ങളുടെയോ മറ്റ് ജീവികളുടെയോ ഭാഗമാകും. അപ്പോൾ പ്രകൃതിയിൽ ഉള്ളതൊന്നും നശിക്കുന്നില്ല എന്നും പുതുതായി ഒന്നും ഉണ്ടാകുന്നുമില്ല എന്നും മനസ്സിലാക്കാം. ആരാണ് പ്രപഞ്ചത്തെയും ഇക്കാണുന്ന സർവ്വചരാചരങ്ങളെയും സൃഷ്ടിച്ചത് എന്ന് ചോദിക്കുമ്പോൾ മേൽപ്പറഞ്ഞ വസ്തുതകൾ കണക്കിലെടുക്കേണ്ടി വരും. മാത്രമല്ല ആരാണ് സൃഷ്ടിച്ചത് എന്ന ചോദ്യം തന്നെ നിലനിൽക്കാത്ത ചോദ്യമാണ്. കാരണം ആർക്കും സൃഷ്ടിക്കാൻ കഴിയാത്തതാണ് പ്രപഞ്ചം. എങ്ങനെ ഈ പ്രപഞ്ചം ഉണ്ടായി എന്ന ചോദ്യം മാത്രമേ ചോദിക്കാൻ കഴിയൂ.

ശരീരത്തിൽ ഉള്ള മൂലകങ്ങളുടെ അനുപാതം മേലെ എഴുതിയെങ്കിൽ ഇനി ഭൂമിയിൽ ഉള്ള മൂലകങ്ങളുടെ അനുപാതം നോക്കാം. ഭൂമിയിൽ 46% ഓക്സിജനും, 27% സിലിക്കണും, 8% അലുമിനിയവും, 5% ഇരുമ്പും 4% കാൽസിയവും 2% ശതമാനം വീതം സോഡിയവും മെഗ്‌നീഷ്യവും പൊട്ടാസിയവും ബാക്കി മൂന്ന് ശതമാനമാണ് 80ൽ അധികം മൂലകങ്ങൾ ഉള്ളത്.  സൂര്യനിൽ 75ശതമാനം ഹൈഡ്രജനും 24ശതമാനം ഹീലിയവും 1ശതമാനം ഓക്സിജനും ആണുള്ളത് എന്നാണ് കണക്ക്. ഹൈഡ്രജൻ മൂലകം ഹീലിയം മൂലകം ആയി മാറുന്ന രാസപ്രവർത്തനം ആണ് സൂര്യനിൽ അനവരതം നടക്കുന്നത്. അതിന്റെ ഫലമാണ് സൂര്യനിൽ നിന്ന് പ്രകാശവും ഊർജ്ജവും ഭൂമിയിൽ എത്തുന്നത്.

നമ്മുടെ ശരീരത്തിലും ശരി, ചുറ്റുപാടിലും ശരി, അന്തരീക്ഷത്തിലായാലും പ്രകൃതിയിൽ ആയാലും നടക്കുന്ന പ്രവർത്തനങ്ങൾ അത്യന്തം അത്ഭുതകരങ്ങളാണ്. അറിവുകളുടെ മഹാസാഗരത്തിനു മുന്നിലാണ് നാം നിൽക്കുന്നത്. പക്ഷെ ആളുകൾ വിശ്വാസങ്ങളുടെ അന്തകാരത്തിൽ തപ്പിത്തടയുകയാണ്. അറിവുകൾ ജീവിതത്തെ മനോഹരമായ ഒരനുഭവം ആക്കിത്തീർക്കും.

എന്താണ് അജിനോമോട്ടോ?


അടിസ്ഥാന രുചികൾ എന്ന് പറയുന്നത് മധുരം, ഉപ്പ്, കയ്പ്പ്, പുളി എന്നിവയാണ് കൂടാതെ അഞ്ചാമതൊരു രുചി കൂടിയുണ്ട്. ജപ്പാൻ ഭാഷയിൽ ഈ രുചിക്ക് ഉമാമി (umami) എന്നാണ് പറയുക. നമ്മൾ ഇറച്ചിക്കറിയൊക്കെ കഴിക്കുമ്പോൾ അതിനൊരു പ്രത്യേക രുചിയില്ലേ? ആ രുചിയാണ് ഉമാമി. നമ്മുടെ നാവുകൾക്ക് ഈ രുചിയും തിരിച്ചറിയാനുള്ള taste receptor ഉണ്ട്. അതുകൊണ്ടാണ് മാംസാഹാരം പൊതുവെ നമുക്ക് ഇഷ്ടപ്പെടുന്നത്. ഈ ഉമാമിരുചി ഭക്ഷണ പദാർത്ഥങ്ങൾക്ക് നൽകാൻ ഉപയോഗിക്കുന്ന അഡിറ്റീവ് (additive) ആണു അജിനോമോട്ടോ. ജപ്പാന്‍ ആസ്ഥാനമായുള്ള Ajinomoto Co. Inc. എന്ന ബഹുരാഷ്ട്ര കമ്പനിയാണ് ഇത് ഉല്പാദിപ്പിച്ച് ലോകത്ത് നൂറിൽ പരം രാജ്യങ്ങളിൽ വിൽക്കുന്നത്. അജിനോമോട്ടോ എന്നത് ഒരു ബ്രാൻഡ് നെയിം ആണ്. 

എന്താണ് അജിനോമോട്ടോ എന്ന് ചോദിച്ചാൽ ഇത് പ്രകൃതിയിൽ ഉള്ള Monosodium Glutamate എന്ന പദാർത്ഥം ആണ്. MSG എന്ന് ചുരുക്കപ്പേരിൽ പറയും. കരിമ്പ്, ചോളം എന്നിവ പുളിപ്പിക്കലിനു (fermentation) വിധേയമാക്കിയിട്ടാണ് ഈ മോണോ സോഡിയം ഗ്ലൂട്ടമേറ്റ് വ്യാവസായികമായി ഉല്പാദിപ്പിച്ച് അജിനോമോട്ടോ എന്ന ബ്രാൻഡ് നെയിമിൽ വിൽക്കുന്നത്. ഈ അജിനോമോട്ടോ എത്രയോ കാലമായി ആഹാരപദാർത്ഥങ്ങൾ പാകം ചെയ്യുമ്പോൾ ഹോട്ടലുകളിൽ ഉപയോഗിക്കുന്നുണ്ടെങ്കിലും ഇത് വരെയായി ഒരു ദോഷവും റിപ്പോർട്ട് ചെയ്യപ്പെട്ടിട്ടില്ല. 

നമ്മളെയൊക്കെ ഹോട്ടലിലെ ചില ഭക്ഷണപദാർത്ഥങ്ങൾ പ്രത്യേകിച്ചും KFC ചിക്കൻ പോലുള്ളവ ആകർഷിക്കുന്നെങ്കിൽ അതിനു കാരണം ഈ ഉമാമി രുചിയും ആ രുചി വർദ്ധിപ്പിക്കുന്ന അജിനോമോട്ടോ എന്ന taste enhancer-ഉം ആണ്. എന്നാൽ അജിനോമോട്ടോ ശരീരത്തിനു അപകടകാരിയാണെന്ന പ്രചാരണവും കുറേക്കാലമായി നടന്നു വരുന്നുണ്ട്. അതുകൊണ്ട് ആളുകളെ അജിനോമോട്ടോ ഭയം പിടികൂടിയിട്ടുമുണ്ട്. മറ്റ് ആഹാരപദാർത്ഥങ്ങളെയും വ്യാജപ്രചരണങ്ങളിൽ പേടിക്കുന്ന പോലെയേ ഈ പേടിയും ഉള്ളൂ. അജിനോമോട്ടോ ഒരിക്കലും അധികം ഉപയോഗിക്കില്ല. കാരണം കൂടുതലായാൽ ഉപ്പുരസം അധികമായി ഭക്ഷിക്കാൻ കഴിയാതെ വരും. 

അജിനോമോട്ടോ പിറന്നതിന്റെ പിന്നിൽ രസകരമായ കഥയുണ്ട്. അതൊന്നും ഇവിടെ വിവരിക്കുന്നില്ല. എന്താണ് Monosodium Glutamate എന്ന പദാർത്ഥം എന്നതിന്റെ സയൻസ് മാത്രം ഇപ്പോൾ എഴുതാം. അതാണല്ലോ അജിനോമോട്ടോ എന്ന പേരിൽ വിൽക്കപ്പെടുന്നത്. 

ആദ്യമായി നമുക്ക് പ്രോട്ടീൻ എന്താണെന്ന് നോക്കാം. നമ്മുടെ ശരീരത്തിൽ  പലതരം പ്രോട്ടീനുകൾ ഉണ്ട്. ഈ പ്രോട്ടീനുകൾ എല്ലാം 20 തരം അമിനോ ആസിഡുകൾ പല കോമ്പിനേഷനിൽ സംയോജിച്ചിട്ടാണ് ഉണ്ടാകുന്നത്. ഓരോ ജീവിയും സസ്യവും അതിനു ആവശ്യമായ പ്രോട്ടീനുകൾ സ്വയം ഉണ്ടാക്കുന്നു.  ഹൈഡ്രജനും കാർബണും ഓക്സിജനും നൈട്രജനും സംയോജിച്ച് അമിനോ ആസിഡ്‌സും ഇത് സയോജിച്ച് പ്രോട്ടീനും ഉണ്ടാകുന്നു. പ്രോട്ടീൻ ആണ് ഏത് ജീവിയുടെയും ശരീരത്തിന്റെ ബിൽഡിങ്ങ് ബ്ലോക്കുകൾ ആയ കോശങ്ങളുടെ നിർമ്മിതിക്ക് ഒഴിച്ചുകൂടാനാകാത്ത പോഷകഘടകം എന്ന് അറിയാമല്ലൊ.

പ്രോട്ടീൻ നിർമ്മിതിക്ക് ആകെ 20 തരം അമിനോ ആസിഡുകൾ വേണം എന്ന് പറഞ്ഞല്ലൊ. ഇതിൽ 11 തരം അമിനോ ആസിഡുകൾ നമ്മുടെ ശരീരം തന്നെ നിർമ്മിക്കും. ബാക്കി വരുന്ന 9 തരം അമിനോ ആസിഡുകൾ നമുക്ക് ഭക്ഷണത്തിൽ നിന്ന് നേരിട്ട് ലഭിക്കണം. അതുകൊണ്ട് ഈ ഒൻപത് അമിനോ ആസിഡുകളെ എസ്സൻഷ്യൽ അമിനോ ആസിഡ്സ് എന്ന് പറയൂന്നു. 

ശരീരം നിർമ്മിക്കുന്ന 11 അമിനോആസിഡുകളെ അതുകൊണ്ട് നോൺ എസ്സൻഷ്യൽ അമിനോ ആസിഡ്സ് എന്ന് പറയും. അവ ഭക്ഷണത്തിൽ നിന്ന് നേരിട്ട് കിട്ടിയില്ലെങ്കിലും സാരമില്ല. ഈ 11 അമിനോ ആസിഡ്സുകളിൽ അല്ലെങ്കിൽ ആകെയുള്ള 20 അമിനോആസിഡ്സുകളിൽ ഒന്നാണ് ഗ്ലൂട്ടമിക്ക് ആസിഡ് (Glutamic acid) എന്ന അമിനോആസിഡ്. പ്രകൃതിയിൽ ഏറ്റവും അധികം ഉള്ള അമിനോ ആസിഡും ഇതാണ്. 

Glutamic acid എന്നത് പ്രോട്ടീന്റെ ഘടകം ആയ ഒരു അമിനോ ആസിഡ് ആണ്. പക്ഷെ പ്രോട്ടീനിൽ അല്ലെങ്കിൽ കോശങ്ങളിൽ ഇത് Glutamate എന്ന പദാർത്ഥം ആണ്. അമിനോ ആസിഡുകൾ സ്വതന്ത്രമായി നിൽക്കില്ലല്ലൊ. പ്രോട്ടീൻ എന്നത് ഒരു ജൈവസംയുക്തം ആണ്. അതിലെ ഘടകപദാർത്ഥമാണ് അമിനോ ആസിഡുകൾ. അതുകൊണ്ട് Glutamic acid എന്ന അമിനോആസിഡ് പ്രോട്ടീനിൽ Glutamate എന്ന ഘടകപദാർത്ഥം ആയിട്ടാണുണ്ടാവുക. 

എന്താണ് Glutamic acid-ഉം Glutamate-ഉം തമ്മിലുള്ള വ്യത്യാസം എന്ന് നോക്കാം. പൊതുവെ കെമിസ്ട്രിയിൽ 'ate' എന്ന പ്രത്യയം ചേർക്കുന്നത് ഒരു തന്മാത്രയിൽ നിന്ന് ഒരു ഹൈഡ്രജൻ ആറ്റം നഷ്ടപ്പെടുമ്പോഴാണ്. ഗ്ലൂട്ടമിക് ആസിഡിൽ നിന്ന് ഒരു ഹൈഡ്രജൻ ആറ്റം നഷ്ടമാവുകയും പകരം ഒരു സോഡിയം അയൺ (ion) അതിനൊപ്പം ചേരുകയും ചെയ്യുന്നതാണ് Glutamate അഥവാ Monosodium Glutamate. ഇതിൽ മോണോ സോഡിയം എന്നത് Glutamic acid-ന്റെ കൂടെ ഒരു സോഡിയം ചേരുന്നു എന്ന് സൂചിപ്പിക്കുന്നു. 

ഈ Monosodium Glutamate ആണ് വൈനും ബീറും ഒക്കെ ഉണ്ടാക്കുന്നത് പോലെ സ്റ്റാർച്ചോ കരിമ്പോ ചോളമോ ഒക്കെ പുളിപ്പിച്ച് അതിൽ നിന്ന് ഇപ്പറഞ്ഞ Monosodium Glutamate വേർതിരിച്ചെടുത്ത് വ്യാവസായികമായി നിർമ്മിച്ച് അജിനോമോട്ടോ എന്ന പേരിൽ വിൽക്കുകയും ഉമാമി എന്ന ഫ്ലേവറും രുചിയും കൂട്ടാൻ വേണ്ടി ചില ആഹാരപദാർത്ഥങ്ങളിൽ ചേർക്കുന്നത്. ഇതുകൊണ്ട് സ്വാദും രുചിയും വർദ്ധിക്കും എന്നല്ലാതെ യാതൊരു ദോഷവും ഇല്ല. 

അമ്മയുടെ മുലപ്പാലിൽ പോലും ഈ Glutamate ഉണ്ട്. അധികമായാലോ എന്ന ചോദ്യത്തിനു പ്രസക്തിയില്ല. കാരണം എന്തെങ്കിലും അധികമാകാമോ, പച്ചവെള്ളം പോലും? ഈ MSG ഫെർമന്റേഷൻ രീതിയിൽ വേർതിരിച്ചെടുക്കുന്ന വിദ്യ കണ്ടുപിടിച്ച kikunae ikeda എന്ന ജപ്പാൻ ശാസ്ത്രജ്ഞന് ഇതിന്റെ പേറ്റന്റ് അവകാശം ഉണ്ടായിരുന്നു. ആ അവകാശം പിന്നെ അജിനോമോട്ടോ കമ്പനിക്ക് വിറ്റു. അങ്ങനെയാണ് അജിനോമോട്ടോ ഇന്ത്യയിലും എത്തിയത്. അജിനോമോട്ടോ എന്നാൽ രുചിയുടെ സത്ത് (essence of taste) എന്നാണ് ജാപ്പാനീസ് ഭാഷയിൽ അർത്ഥം.

അതുകൊണ്ട് അജിനോമോട്ടോയെ പേടിക്കേണ്ട. ഇങ്ങനെ പറയുമ്പോൾ പലരും പറയുന്ന ഒരു ക്ലീഷേയുണ്ട്, അധികം ചേർത്താലോ എന്ന്. അജിനോമോട്ടോയുടെ കാര്യത്തിൽ അതും പേടിക്കേണ്ട. കാരണം അധികം ചേർത്താൽ വല്ലാതെ കയ്പ് അനുഭവപ്പെടുന്ന ഉപ്പ് രസം ആയിരിക്കും. വായിൽ വെക്കാൻ പറ്റില്ല. അതുകൊണ്ട് അങ്ങനെ ആരെങ്കിലും ചെയ്യുമോ? എന്തും വിഷമാണ് എന്ന് പ്രചരിപ്പിക്കാൻ ആളുകൾക്ക് വല്ലാത്ത ഉത്സാഹമാണ്. തിന്നുന്നതെന്തും വിഷമാണ് എന്ന് പറയാനും എന്നിട്ട് ആർത്തിയോടെ തിന്നാനുള്ള ഉത്സാഹത്തിനും ഒരു കുറവും ഇല്ല എന്നതാണ് ഇതിലെ തമാശ.

ഹൃദയധമനിയിൽ ബ്ലോക്ക് ഉണ്ടാകുന്നത് എങ്ങനെയാണ്?

ചീത്ത കൊളസ്ട്രോൾ അഥവാ LDL കൊളസ്ട്രോൾ രക്തത്തിൽ അധികം ആകുമ്പോൾ അത് ഹൃദയപേശികളിലേക്ക് രക്തം എത്തിക്കുന്ന കൊറോണറി ധമനിയിൽ അടിഞ്ഞുകൂടി പ്ലേക് രൂപപ്പെടുകയും അങ്ങനെ അതറോസ്ക്ലിറോസിസ് (Atherosclerosis) എന്ന അവസ്ഥ സംജാതമാവുകയും അതാണ് ഹൃദയാഘാതത്തിനും ഹൃദയസ്തംഭനത്തിനും കാരണമാകുന്ന ബ്ലോക്ക് എന്നാണ് ഡോക്ടർമാരും പൊതുസമൂഹവും വിശ്വസിച്ചു വരുന്നത്. ചുരുക്കി പറഞ്ഞാൽ ചീത്ത കൊളസ്ട്രോൾ ആണ് ബ്ലോക്കിനു കാരണം എന്ന്. ഈ ചീത്ത കൊളസ്ട്രോൾ എന്ന് പറയുന്ന LDL ,  കൊളസ്ട്രോൾ അല്ല എന്നും അത് ലിപോ പ്രോട്ടീൻ ആണെന്നും കൊളസ്ട്രോൾ ഒന്നേയുള്ളൂ എന്നും നല്ലതും ചീത്തയും ആയി രണ്ട് വിധം ഇല്ലെന്നും ഞാൻ മുൻപേ എഴുതിയത് ഓർക്കുമല്ലോ. കൊളസ്ട്രോളിനെ നല്ലതും ചീത്തയും ആയി വർഗീകരിക്കുന്നതും  LDL , HDL എന്നിങ്ങനെയുള്ള ലിപോ പ്രോട്ടീനുകളെ കൊളസ്ട്രോൾ എന്ന് കരുതുന്നതും തികഞ്ഞ വിവരക്കേടാണ്.  നമ്മുടെ ഡോക്ടർമാർ ഈ വിവരക്കേടിനെ ഇപ്പോഴും ഒരലങ്കാരമായി കൊണ്ടുനടക്കുന്നത് ദൗർഭാഗ്യകരമാണ്. കാരണം ലിപോ പ്രോട്ടീൻ എന്നത് കൊളസ്ട്രോൾ, ട്രൈഗ്ലിസറൈഡ്‌സ്, ഫോസ്‌ഫോലിപിഡ്സ്, വെറും പ്രോട്ടീൻ എന്നിവ അടങ്ങിയതാണ്. 

കൊളസ്ട്രോൾ അധികം ആയാൽ ബ്ലോക്ക് ഉണ്ടാകുമോ? അഥവാ കൊളസ്ട്രോൾ ആണോ ബ്ലോക്കിനു കാരണം? എന്തിനും ഒരു കാരണം ഉണ്ടാകണം. ഒരു കാരണം ഇല്ലാതെ ഒരു കാര്യവും ഉണ്ടാകുന്നില്ല എന്ന കാര്യകാരണബന്ധം പ്രകൃതിയുടെ ഒരു നിയമം ആണ്. അപ്പോൾ ഹൃദയധമനിയിൽ ബ്ലോക്ക് ഉണ്ടാകാനുള്ള യഥാർത്ഥ കാരണം ആണ് നമ്മൾ കണ്ടെത്തേണ്ടത്. കൊഴുപ്പും കൊളസ്ട്രോളും കാൽസിയവും ഒക്കെ അടിഞ്ഞു കൂടിയിട്ടാണ് ബ്ലോക്ക് ഉണ്ടാകുന്നത് എന്നാണ് ഇപ്പോൾ ലേറ്റസ്റ്റായി പറഞ്ഞു കേൾക്കുന്ന കാര്യം. എന്നാൽ ഇതും ഒരു കാരണം അല്ല. ഇവയൊക്കെ ഒരു കാരണവും ഇല്ലാതെ ചുമ്മാ ധമനിയിൽ പോയി അടിയുമോ? 

അപ്പോൾ നമ്മൾ യഥാർത്ഥ കാരണം മനസ്സിലാക്കണം. ഡോക്ടർമാർ ഈ കാരണം മനസ്സിലാക്കിയെങ്കിൽ നന്നായിരുന്നു. കൊളസ്ട്രോൾ ഒരിക്കലും രക്തത്തിൽ അധികം ഉണ്ടാവില്ല. കാരണം ഭക്ഷണത്തിൽ നിന്ന് എത്ര കിട്ടിയാലും ആവശ്യമുള്ളതിന്റെ 75 ശതമാനം കൊളസ്ട്രോളും ലിവർ ആണ് ഉല്പാദിപ്പിക്കുന്നത് എന്ന വസ്തുത ഡോക്ടർമാർ ആരും നിഷേധിക്കില്ല. അപ്പോൾ ഡോക്ടർമാർ പറയും LDL ആണ് പ്രശ്നം എന്ന്. LDL എന്നാൽ കൊളസ്ട്രോളും ട്രൈഗ്ലിസറൈഡും മറ്റ് ലിപിഡ്‌സും പ്രോട്ടീനും ചേർന്ന ഒരു പായ്ക്ക് ആണെന്ന വസ്തുതയും ഡോക്ടർമാർ നിഷേധിക്കില്ല. അപ്പോൾ LDL എന്ന പായ്ക്ക് ആണോ ധമനിയിൽ ഒട്ടിപ്പിടിച്ച് ബ്ലോക്ക് ആകുന്നത് അതോ ആ പായ്ക്കിൽ നിന്ന് കൊളസ്ട്രോൾ ഊർന്നു വീഴുന്നുവോ? 

ധമനിയിൽ എങ്ങനെ പ്ലേക് രൂപപ്പെടുന്നു എന്നതിന്റെ കാരണം തേടുമ്പോഴാണ് നാം ഇൻഫ്ലമേഷൻ അഥവാ വീക്കം എന്ന പ്രതിഭാസത്തിൽ എത്തുക. എന്താണ് ഈ ഇൻഫ്ലമേഷൻ എന്ന് നോക്കാം. ശരീരത്തിൽ ഒരു മുറിവ് ഉണ്ടായാലോ വല്ലതും കടിച്ചാലോ ആ ഭാഗത്ത് ഒരു വീക്കം വളരെ പെട്ടെന്ന് രൂപപ്പെടുന്നത് കാണാം. ഇൻഫ്ലമേഷന്റെ ഒരു ഉദാഹരണം ആണിത്. എന്തെങ്കിലും മുറിവോ ക്ഷതമോ സംഭവിച്ചാൽ അത് ശരീരം തന്നെ ഗുണപ്പെടുത്തുന്നതിന്റെ ആദ്യപടിയാണ് ഈ ഇൻഫ്ലമേഷൻ എന്നത്. മുറിവ് ഉണ്ടായ ഭാഗത്ത് രക്തക്കുഴൽ ചുരുങ്ങി ബ്ലീഡിങ്ങ് തടയുന്നു. അവിടെ രക്തം തിക്ക് ആയി കട്ടപിടിക്കുന്നു. മുറിവിൽ വൈറസ്സോ ബാക്റ്റീരിയകളോ പ്രവേശിക്കാതെ തടയാൻ ഇമ്മ്യൂൺ സിസ്റ്റം അവിടേയ്ക്ക് വെള്ള രക്താണുക്കളെ കേന്ദ്രീകരിപ്പിക്കുന്നു. ഇതിന്റെയൊക്കെ ആകെ ഫലം ആണ് ഇൻഫ്ലമേഷൻ എന്നത്. ആ ഭാഗം പൂർവ്വസ്ഥിതിയിലാകാൻ അവിടെ കോശവിഭജനം നടന്ന് പുതിയ കോശങ്ങൾ ഉണ്ടാകുന്നു. അപ്പോൾ പുതിയ കോശങ്ങളുടെ നിർമ്മിതിക്ക് കൊളസ്ട്രോൾ അടക്കമുള്ള എല്ലാ പദാർത്ഥങ്ങളെയും രക്തം അവിടേയ്ക്ക് എത്തിക്കുന്നു. ഒടുവിൽ മുറിവ് ഉണങ്ങുമ്പോൾ അവിടെ ഒരു വടു (protective scar) അവശേഷിക്കുന്നു. 

ഇത് തന്നെയാണ് രക്തധമനിയുടെ ഉൾഭാഗത്തും സംഭവിക്കുന്നത്. അവിടെ പക്ഷെ മുറിവിനു പകരം പല കാരണങ്ങളാലുള്ള ഡാമേജ് ആണ് ഉണ്ടാകുന്നത്. ഡാമേജ് ഉണ്ടാകുമ്പോൾ ഇൻഫ്ലമേഷൻ ഉണ്ടാകുന്നു. ഡാമേജ് റിപ്പയർ ചെയ്യാൻ മേൽപ്പറഞ്ഞ എല്ലാ പ്രവർത്തനങ്ങളും അവിടെ നടക്കുന്നു. ഒടുവിൽ അവിടെ വടുവിനു പകരം പ്ലേക്ക് രൂപപ്പെടുന്നു. ആ പ്ലേക്കിൽ കൊളസ്ട്രോൾ അടക്കം കോശനിർമ്മിതിക്ക് ആവശ്യമായ എല്ലാ ഘടങ്ങളും ഉണ്ടാവുകയും ചെയ്യും. എവിടെ ഒരു കോശം പുതിയതായി ഉണ്ടാകണമോ അതിനു കൊളസ്ട്രോളും വേണം. കാരണം നമ്മുടെ കോശങ്ങളുടെ ബാഹ്യഭാഗത്ത് ഒരു സ്തരം ഉണ്ട്. അത് കൊളസ്ട്രോൾ കൊണ്ടാണ് നിർമ്മിക്കപ്പെടുന്നത്. ചുരുക്കി പറഞ്ഞാൽ ഡാമേജ് സംഭവിച്ച ധമനിയുടെ റിപ്പയറിങ്ങിന്റെ ഭാഗമായാണ് കൊളസ്റ്റ്രോൾ അവിടെ എത്തുന്നത്. അവിടെ രൂപപ്പെട്ട പ്ലേക്കിൽ കോശനിർമ്മിതിക്ക് ആവശ്യമായ മുഴുവൻ ഘടകങ്ങളും ഉണ്ടാകും. കൊളസ്ട്രോളോ കൊഴുപ്പോ കാൽസിയമോ ചുമ്മാ അടിഞ്ഞുകൂടി പ്ലേക് ഉണ്ടാക്കുന്നതല്ല.

ധമനിയിൽ ഡാമേജ് ഉണ്ടാവുകയും അപ്പോൾ ഇൻഫ്ലമേഷൻ ഉണ്ടാവുകയും, ഡാമേജ് ഉണ്ടാകുന്നതിന്റെ കാരണങ്ങൾ പരിഹരിക്കപ്പെടാതെ ക്രോണിക് ഇൻഫ്ലമേഷൻ ഉണ്ടാവുകയും ഒക്കെ ചെയ്യുന്നതിന്റെ ഫലം ആണ് പ്ലേക് ഉണ്ടായി ബ്ലോക്ക് ആയി മാറുന്നത് എന്നതാണ് യാഥാർഥ്യം. എന്നിട്ടാണ് കൊളസ്ട്രോൾ എന്ന അമൂല്യമായ പദാർത്ഥത്തെ നമ്മൾ ബ്ലോക്കിന്റെ കാരണമായ കുറ്റവാളിയായി നമ്മൾ കരുതുന്നത്. കൊളസ്ട്രോൾ മാത്രമല്ല, ട്രൈഗ്ലിസറൈഡോ പൂരിതകൊഴുപ്പോ മുട്ടയോ മാംസമോ ഒന്നും ബ്ലോക്ക് ഉണ്ടാകുന്ന കാര്യത്തിൽ കുറ്റവാളിയല്ല. ധമനിയിൽ ഡാമേജ് എങ്ങനെ ഉണ്ടാകുന്നു എന്നതാണ് യഥാർത്ഥ പ്രശ്നം. അത് അമിത ബ്ലഡ് പ്രഷർ കൊണ്ടാകാം, മാനസികമായ പിരിമുറുക്കങ്ങൾ കൊണ്ടാകാം , പുകവലി കൊണ്ടാകാം, പ്രമേഹം കൊണ്ടാകാം ഇവയെല്ലാം കൊണ്ടുമാകാം. ആ കാരണങ്ങൾ ഒഴിവാക്കുകയാണ് ബ്ലോക്ക് വരാതിരിക്കാൻ ചെയ്യേണ്ടത്. അല്ലാതെ കൊളസ്ട്രോൾ കുറയ്ക്കാൻ മരുന്ന് കുടിച്ച് ശാരീരികവും മാനസികവുമായ ഭവിഷ്യത്തുകൾ വരുത്തിക്കൂട്ടുകയുല്ല വേണ്ടത്. 

കൊളസ്ട്രോൾ കുറയ്ക്കാൻ എഴുതിത്തരുന്ന സ്റ്റാറ്റിൻ മരുന്നുകളുടെ ദൂഷ്യഫലങ്ങളെ പറ്റി അടുത്ത പോസ്റ്റിൽ എഴുതാം. അതേ സമയം സ്റ്റാറ്റിൻ മരുന്ന് ആവശ്യമായ അപൂർവമായ ഒരു രോഗമുണ്ട്. Familial hypercholesterolemia എന്ന ജനിതകരോഗം ആണത്. അതൊരു ജനിതകവൈകല്യമാണ്. ജന്മനാ ഉണ്ടാകുന്ന ആ രോഗത്തിനു സ്റ്റാറ്റിൻ മരുന്ന് ആവശ്യമാണ് എന്ന് കരുതി അത്തരം വൈകല്യം ഇല്ലാത്തവർക്കും കൊളസ്ട്രോൾ അധികം എന്ന വികല സങ്കല്പത്തിന്റെ പുറത്ത് സ്റ്റാറ്റിൻ മരുന്ന് പ്രിസ്ക്രൈബ് ചെയ്യുന്നത് മനുഷ്യവംശത്തോട് ചെയ്യുന്ന ക്രൂരതയാണ് എന്ന് ഡോക്ടർമാർ മനസ്സിലാക്കേണ്ട സമയം അതിക്രമിച്ചിരിക്കുന്നു.

കൊളസ്ട്രോൾ ഹൃദ്രോഗം ഉണ്ടാക്കുകയില്ല.

ഈ നൂറ്റാണ്ടിലെ ഏറ്റവും വലിയ അന്ധവിശ്വാസമാണ് കൊളസ്ട്രോൾ രക്തധമനികളിൽ അടിഞ്ഞുകൂടി ബ്ലോക്ക് ഉണ്ടാക്കി ഹൃദയസ്തംഭനം അല്ലെങ്കിൽ സ്ട്രോക്കിന് കാരണമാകും എന്നത്.  Ancel Benjamin Keys എന്ന അമേരിക്കൻ ഫിസിയോളജിസ്റ്റ് ഏഴ് രാജ്യങ്ങളിൽ നടത്തിയ ഒരു പഠനത്തിൽ നിന്ന് എത്തിയ ഒരു നിഗമനം ആണ് ഈ അന്ധവിശ്വാസത്തിനു ആധാരം. എന്നാൽ ഈ ആൻസൽ കീസ് കുറെക്കൂടി രാജ്യങ്ങളിൽ വുസ്തുനിഷ്ടമായ പഠനം നടത്തിയിരുനെങ്കിൽ അദ്ദേഹം ഇങ്ങനെയൊരു നിഗമനത്തിൽ എത്തില്ലായിരുന്നു. ഫാറ്റ് അല്ലെങ്കിൽ കൊഴുപ്പ് എന്തോ ദോഷമാണ് എന്നൊരു മുൻവിധിയിൽ, ആ ധാരണയെ സാധൂകരിക്കാൻ വേണ്ടി അദ്ദേഹം ഒരു വ്യാജപഠനം നടത്തി എന്ന് വേണം അനുമാനിക്കാൻ. എന്തായാലും യാതൊരു ലോജിക്കും ഇല്ലാത്ത ഒരു പൊട്ടൻ തിയറി നമ്മുടെ ഡോക്ടർമാർ വിശ്വസിക്കുകയും കൊളസ്ട്രോൾ ടെസ്റ്റ് ചെയ്യാൻ ആളുകളോട് നിർദ്ദേശിക്കുകയും , കൊളസ്ട്രോൾ ലവൽ അധികമാണ് എന്ന് ലാബ് റിപ്പോർട്ട് കിട്ടിയാൽ കൊളസ്ട്രോൾ കുറയ്ക്കാൻ മരുന്ന് കുറിച്ചു കൊടുക്കുകയും ചെയ്യുന്നു. ഡയറ്റ് നിർദ്ദേശിക്കുന്നവർ മുട്ടയുടെ മഞ്ഞക്കരു ഉപേക്ഷിക്കാനും പറയുന്നു. ഇതൊക്കെ മിതമായ ഭാഷയിൽ പറഞ്ഞാൽ മനുഷ്യരോട് ചെയ്യുന്ന ക്രൂരതയാണ്. 

കൊളസ്ട്രോൾ എന്ന് പറഞ്ഞാൽ മനുഷ്യനു ജീവനോടെ നിലനിൽക്കാൻ അത്യാവശ്യം വേണ്ടതായ ഒരുമാതിരി കൊഴുപ്പ് ആണ്. പ്രകൃതിയിൽ ഈ കൊഴുപ്പ് സ്വതന്ത്രമായി എവിടെയും ഇല്ല. മനുഷ്യൻ അടക്കമുള്ള ജന്തുശരീരത്തിൽ മാത്രമേ കൊളസ്ട്രോൾ ഉള്ളൂ. സസ്യങ്ങളിൽ കൊളസ്ട്രോൾ ഇല്ല. മനുഷ്യന്റെയും ജന്തുക്കളുടെയും ലിവർ ആണ് കൊളസ്ട്രോൾ ഉല്പാദിപ്പിക്കുന്നത്. നമ്മൾ മാംസാഹാരം കഴിക്കുമ്പോൾ അവയിൽ നിന്ന് നമുക്ക് കൊളസ്ട്രോൾ ലഭിക്കുന്നു. മാംസാഹാരം കഴിക്കാത്തവരുടെ കാര്യത്തിൽ ശരീരത്തിനു ആവശ്യമുള്ള മുഴുവൻ കൊളസ്ട്രോളൂം ശരീരം തന്നെ ഉല്പാദിപ്പിക്കും. എങ്ങനെ എന്ന് ചോദിച്ചാൽ C₂₇H₄₆O ആണ് കൊളസ്ട്രോളിന്റെ തന്മാത്രാ സമവാക്യം. അതായത് ഒരു കൊളസ്ട്രോൾ തന്മാത്രയിൽ 27 കാർബണും 46 ഹൈഡ്രജനും ഒരു ഓക്സിജനും ആണുള്ളത്. നാം കഴിക്കുന്ന ചോറിലെ കാർബൺ,ഹൈഡ്രജൻ,ഓക്സിജൻ ഉപയോഗിച്ച് തന്നെ ലിവർ കൊളസ്ട്രോൾ ഉണ്ടാക്കും. അത് പോലെ തന്നെ നാം കഴിക്കുന്ന ചോറും മറ്റ് ആഹാരപദാർത്ഥങ്ങളും തന്നെയാണ് ശരീരത്തിൽ വെച്ച് ട്രൈഗ്ലിസറൈഡ് ആയി മാറുന്നതും. മൂന്ന് യൂനിറ്റ് ഫാറ്റി ആസിഡും ഒരു യൂനിറ്റ് ഗ്ലിസറോളും ചേർന്നതാണ് ട്രൈഗ്ലിസറൈഡ്. കാർബൺ,ഹൈഡ്രജൻ,ഓക്സിജൻ എന്നിവയുടെ കൂടെ നൈട്രജനും ചേർന്നിട്ടാണ് പ്രോട്ടീൻ ഉണ്ടാകുന്നത്. ഇതൊക്കെ നമ്മുടെ ശരീരം നാം കഴിക്കുന്ന ഭക്ഷണം ഉപയോഗിച്ച് സ്വയം നിർമ്മിക്കുന്നുണ്ട്. 

കൊളസ്ട്രോൾ ടെസ്റ്റ് എന്നത് തന്നെ ഒരു മാതിരി തട്ടിപ്പ് ആണെന്ന് പറയേണ്ടി വരും. കാരണം ശരീരത്തിലെ കൊളസ്ട്രോൾ ഒരിക്കലും സ്ഥിരം അല്ല എന്ന് മാത്രമല്ല, കൊളസ്ട്രോൾ മാത്രമായി വേർതിരിച്ച് ടെസ്റ്റ് ചെയ്യാനും സാധിക്കില്ല. നമ്മൾ കുറേ സമയം വെയിൽ കൊണ്ടാൽ അപ്പോൾ ശരീരത്തിൽ കൊളസ്ട്രോൾ കുറവായിരിക്കും. കാരണം കൊളസ്ട്രോളിൽ കുറേ ഭാഗം വൈറ്റമിൻ ഡി ആയി മാറിയിട്ടുണ്ടാകും. ശരീരത്തിലെ മിക്കവാറും എല്ലാ പ്രവർത്തനങ്ങൾക്കും കൊളസ്ട്രോൾ വേണം. കൊളസ്ട്രോൾ ഇല്ലെങ്കിൽ നമ്മൾ അപ്പോൾ തന്നെ ചത്തുപോകും. അതുകൊണ്ട് ശരീരം പുറത്ത് നിന്ന് കൊളസ്ട്രോൾ ലഭിക്കാൻ കാത്ത് നിൽക്കുന്നില്ല. അപ്പപ്പോൾ ആവശ്യമായ കൊളസ്ട്രോൾ ശരീരം തന്നെ നിർമ്മിക്കുകയാണ്. ശരീരത്തിൽ  കൊളസ്ട്രോൾ കുറവായോ  കൂടുതലായോ ഉള്ള അവസ്ഥ ഒരിക്കലും കുറേ നേരത്തേക്ക് നീണ്ടുനിൽക്കില്ല. കുറഞ്ഞാൽ ഉല്പാദനം കൂട്ടും. കൂടുതലായാൽ ഉല്പാദനം നിർത്തിവയ്ക്കും. Your cholesterol level will be what your body needs it to be (depending on illness/injury/repair needed etc) എന്ന് ഇംഗ്ലീഷിൽ പറയാം. അതായത് ശരീരത്തിൽ എത്രയാണോ കൊളസ്ട്രോൾ ആവശ്യം അത്രയുമായിരിക്കും നിങ്ങളുടെ ശരീരത്തിൽ എപ്പോഴുമുള്ള കൊളസ്ട്രോൾ ലവൽ. ഇതാണ് സത്യം. അതുകൊണ്ടാണ് കൊളസ്ട്രോൾ കുറയ്ക്കാൻ ഡോക്ടർമാർ മരുന്ന് കുറിച്ചു തരുന്നത് ജനദ്രോഹം ആകുന്നത്. അവരിത് മനസ്സിലാക്കുന്നില്ല എന്ന് മാത്രം. 

കൊളസ്ട്രോൾ ടെസ്റ്റിൽ നമുക്ക് കിട്ടുന്ന റിപ്പോർട്ട് എന്താണ്? Total cholesterol ഇത്ര –  LDL ഇത്ര - HDL ഇത്ര – Triglycerides ഇത്ര എന്ന കണക്കാണ് നമുക്ക് കിട്ടുന്നത്. എന്നിട്ട് ടോട്ടൽ കൊളസ്ട്രോൾ  200 mg/dl ഉം LDL 100 mg/dl ഉം ആണ് നോർമൽ എന്നും പറയും. HDL അധികമാകുന്നതാണ് നല്ലത് എന്നും ഉപദേശിക്കും. ഇതിൽ കൊളസ്ട്രോളിന്റെ കണക്ക് എവിടെയാണുള്ളത്? പക്ഷെ ഡോക്ടർമാർ പറയും  LDL എന്നത് ചീത്ത കൊളസ്ട്രോളും   HDL എന്നത് നല്ല കൊളസ്ടോളും ആണെന്ന്. അപ്പറയുന്നതിനു കാരണമോ LDL കൂടിപ്പോയാൽ ധമനിയിൽ ബ്ലോക്ക് ഉണ്ടാക്കുമെന്നത് കൊണ്ടും. എന്നാൽ സത്യം എന്താണ്?  LDL ഓ  HDLഓ കൊളസ്ട്രോൾ അല്ല. അത് രണ്ടും ലിപോ പ്രോട്ടീൻ ആണ്.  കൊളസ്ട്രോളും ട്രൈഗ്ലിസറൈഡും ഫോസ്‌ഫോ ലിപിഡ്‌സും  പ്രോട്ടീനും അടങ്ങിയതാണ് ലിപോ പ്രോട്ടീൻ എന്നത് . LDL , HDL കൂടാതെ  VLDL എന്നൊരു ലിപോപ്രോട്ടീൻ കൂടിയുണ്ട്. ഈ മുന്ന് ലിപോ പ്രോട്ടീനുകളിലും  അടങ്ങിയ കൊളസ്ട്രോൾ, ട്രൈഗ്ലിസറൈഡ്, ഫോസ്‌ഫോ ലിപിഡ്‌സ്, പ്രോട്ടീൻ എന്നിവയുടെ അനുപാതം ഇപ്രകാരമാണ്: 

LDL is approximately 8% triglyceride, 45% cholesterol, 22% phospholipids and 25% protein.

 HDL is approximately 4% triglyceride, 30% cholesterol, 29% phospholipids and 33% protein.


VLDL is approximately 50% triglyceride, 22% cholesterol, 18% phospholipids and 10% protein.


ഇനി നിങ്ങൾ പറയൂ. 45 ശതമാനം കൊളസ്ട്രോളും 22 ശതമാനം ഫോസ്‌ഫോ‌ ലിപിഡ്സും 25 ശതമാനം പ്രോട്ടീനും 8 ശതമാനം ട്രൈഗിസറൈഡും  അടങ്ങിയ LDL എന്ന ലോ ഡെൻസിറ്റി ലിപോ പ്രോട്ടീനെയാണ് നമ്മൂടെ ഡോക്ടർമാർ ചീത്ത കൊളസ്ട്രോൾ എന്ന് വിശ്വസിക്കുന്നത്. ഇതിൽ പരം അന്ധവിശ്വാസം വേറെയുണ്ടോ?

ഇനി മറ്റൊരു കാര്യം. കൊളസ്ട്രോൾ ആയാലും മറ്റെന്ത് കൊഴുപ്പ് ആയാലും അവ രക്തത്തിൽ സ്വതന്ത്രമായി സഞ്ചരിക്കില്ല. കാരണം കൊഴുപ്പ് ജലത്തിൽ അലിയില്ല. രക്തം വാട്ടർ ബെയിസ് ആണല്ലൊ. അതുകൊണ്ട് കൊളസ്ട്രോളിനെയും മറ്റ് കൊഴുപ്പുകളെയും ഒക്കെ കോശങ്ങളിലേക്ക് വഹിച്ചു കൊണ്ടുപോകുന്ന കേരിയർ ആണ് ലിപോ പ്രോട്ടീനുകൾ.  LDL എന്നാൽ ലിവറിൽ നിന്ന് കോശങ്ങളിലേക്ക് കൊളസ്ട്രോളും ട്രൈഗ്ലിസൈറൈഡും ഫോസ്‌ഫോ‌ലൊപിഡ്‌സും വഹിച്ചു കൊണ്ടുപോകുന്നതും, HDL എന്നാൽ കോശങ്ങളിൽ എത്തിച്ച് മിച്ചം വരുന്നത് വീണ്ടും ലിവറിൽ എത്തിക്കുന്നതുമായ ലിപോ പ്രോട്ടീനുകളാണ്. ഇതാണ് നല്ല കൊളസ്ട്രോൾ എന്നും ചീത്ത കൊളസ്ട്രോൾ എന്നും പറഞ്ഞ് ആളുകളെ തെറ്റിദ്ധരിപ്പിക്കുന്നതും സ്റ്റാറ്റിൻ മരുന്നുകൾ എഴുതിക്കൊടുത്ത് ആളുകളെ വഞ്ചിക്കുന്നതും. മന:പൂർവ്വം അല്ല, തെറ്റിദ്ദാരണകൾ കൊണ്ടാണെന്ന് മാത്രം.

സ്വാഭാവികമായ അവസ്ഥയിൽ രക്തത്തിലൂടെ ഒഴുകുന്ന ലിപോ പ്രോട്ടീനുകളിൽ നിന്ന് കൊളസ്ട്രോളോ ട്രൈഗ്ലിസറൈഡ്സോ അടർന്ന് വീണ് ധമനിയിൽ കട്ടപിടിച്ച് ബ്ലോക്ക് ഉണ്ടാവുകയില്ല. രക്തധമനിയുടെ ഭിത്തിയിൽ ഡാമേജ് ഉണ്ടാവുകയും അതിന്റെ ഫലമായി അവിടെ വീക്കം ഉണ്ടാവുകയും അപ്പോൾ കോശങ്ങൾക്ക് സംഭവിച്ച ക്ഷതം റിപ്പയർ ചെയ്യാൻ അവിടെ കൊളസ്ട്രോൾ അടക്കമുള്ള കോശനിർമ്മാണ പദാർത്ഥങ്ങൾ സംഭരിക്കപ്പെടുകയും ചെയ്യുന്നു. ഇത് ശരീരത്തിൽ എവിടെ ക്ഷതം സംഭവിച്ചാലും നടക്കുന്ന ശാരീരിക പ്രവർത്തനാണ്. ഓരോ കോശത്തിന്റെയും നിർമ്മിതിക്ക് കൊളസ്ട്രോൾ വേണം. ഇതിൽ നിന്ന് നിങ്ങൾ മനസ്സിലാക്കേണ്ടത്. ഹൃദയ രക്തധമനികളിൽ ബ്ലോക്ക് ഉണ്ടാകാൻ കാരണം, ഹൈ ബ്ലഡ് പ്രഷർ, പ്രമേഹം, പുകവലി, സ്ട്രസ്സ് എന്നിവ മൂലം ധമനിയുടെ അന്തർ ഭിത്തിയിൽ ഉണ്ടാകുന്ന ഡാമേജ് ആണ് കാരണം എന്നും അതിനാണ് ചികിത്സ വേണ്ടത് എന്നുമാണ്. ആയതിനാൽ ഒരിക്കലും കൊളസ്ട്രോൾ ടെസ്റ്റ് ചെയ്യാതിരിക്കുക, സ്റ്റാറ്റിൻ മരുന്ന് കഴിക്കാതിരിക്കുക. ഡോക്ടർമാർ എന്നെങ്കിലും ഈ അന്ധവിശ്വാസം തിരുത്തുമെന്ന് ഞാൻ പ്രത്യാശിക്കുന്നു.

കോൺഗ്രസ്സിന്റെ മുന്നിലെ സാധ്യതകൾ, വെല്ലുവിളികൾ!

ഈ വരുന്ന പാർലമെന്റ് തെരഞ്ഞെടുപ്പിൽ കോൺഗ്രസ്സ് പാർട്ടി നേതൃത്വം നൽകുന്ന സർക്കാർ നിലവിൽ വരേണ്ടതുണ്ട്. കോൺഗ്രസ്സ് പാർട്ടി ഇന്ത്യയ്ക്ക് സ്വാതന്ത്ര്യം വാങ്ങിത്തരിക മാത്രമല്ല, ഇന്ത്യയുടെ പാരമ്പര്യത്തിനും സംസ്ക്കാരത്തിനും നാനാത്വത്തിൽ അധിഷ്ഠിതമായ ബഹുസ്വര സമൂഹത്തിനും ചേർന്ന ഒരു ഭരണഘടന തയ്യാറാക്കുകയും ശൂന്യതയിൽ നിന്ന് ഈ രാഷ്ട്രത്തെ കെട്ടിപ്പടുക്കുകയും ചെയ്തിട്ടുണ്ട്. കോൺഗ്രസ്സിനു പകരം കമ്മ്യൂണിസ്റ്റ് പാർട്ടിക്കോ, ഇന്നത്തെ ഭാ.ജ.പാ.യുടെ പൂർവ്വരൂപമായ ഭാരതീയ ജനസംഘത്തിനോ ആയിരുന്നു സ്വാതന്ത്ര്യാനന്തര ഭാരതത്തിന്റെ ഭാഗധേയം നിർണ്ണയിക്കുന്ന ഭരണഘടന തയ്യാറാക്കാനും സർക്കാരിനെ നയിക്കാനും അവസരം കിട്ടിയിരുന്നെങ്കിൽ ഇന്ത്യ ഇന്ന് കാണുന്നത് പോലെ ആയിരിക്കില്ല ഉണ്ടാവുക.

കമ്മ്യൂണിസ്റ്റ് പാർട്ടി ആയിരുന്നെങ്കിൽ തൊഴിലാളിവർഗ സർവ്വാധിപത്യം എന്ന പേരിൽ കമ്മ്യൂണിസ്റ്റ് പാർട്ടിക്ക് ഭരണക്കുത്തകയുള്ള ഏകപാർട്ടിഭരണവും ഫലത്തിൽ അതൊരു സർവ്വാധിപത്യ വ്യവസ്ഥിതിയും ആയിരിക്കും. നാം ഇന്ന് അനുഭവിക്കുന്ന ജനാധിപത്യ സ്വാതന്ത്ര്യമോ പൗരാവകാശങ്ങളോ ആർക്കും ഉണ്ടാവുകയില്ല. കമ്മ്യൂണിസ്റ്റ് പാർട്ടിക്ക് അധികാരം ലഭിച്ച രാജ്യങ്ങളിലെല്ലാം ദേശീയ ജനാധിപത്യവാദികളെ കൊന്നൊടുക്കി ഏകകക്ഷി ഭരണം ആണ് നടപ്പാക്കിയിരുന്നത്. അത്തരം ഒരു ദുർവ്വിധി ആയിരുന്നേനേ, സ്വാതന്ത്ര്യ സമ്പാദനത്തിലും സർക്കാർ രൂപീകരണത്തിലും കോൺഗ്രസ്സിനു പകരം കമ്മ്യൂണിസ്റ്റ് പാർട്ടിക്കായിരുന്നു നേതൃത്വവും മേൽക്കൈയും ആയിരുന്നെങ്കിൽ ഇന്ത്യൻ ജനത അനുഭവിക്കേണ്ടി വന്നിരിക്കുക.

നേരെ മറിച്ച് ഭാരതീയ ജനസംഘത്തിനായിരുന്നു, സ്വാതന്ത്ര്യസമ്പാദനത്തിലും ഭരണഘടനാ നിർമ്മാണത്തിലും സർക്കാർ രൂപീകരണത്തിലും നേതൃത്വവും മേൽക്കൈയും എങ്കിൽ ഇന്ത്യ ഒരു ഹിന്ദുരാഷ്ട്രം ആയേനേ. ഇവിടെയുള്ള മതന്യൂനപക്ഷങ്ങൾക്ക് യാതൊരു പൗരാവകാശങ്ങളും ലഭിക്കില്ല എന്ന് മാത്രമല്ല ഇന്നത്തെ പോലെ ലിബറൽ ജനാധിപത്യവും ഉണ്ടാകുമായിരുന്നില്ല. ഇന്നത്തെ പാക്കിസ്ഥാന്റെ മറ്റൊരു ഹിന്ദു പതിപ്പ് ആയേനേ ഇന്ത്യ. ഇതൊന്നും ആർക്കും നിഷേധിക്കാനോ ഈ സാധ്യത തള്ളിക്കളയാനോ സാധ്യമല്ല. കാരണം കമ്മ്യൂണിസ്റ്റ് പാർട്ടിക്കും ജനസംഘത്തിനും അവരുടേതായ പ്രത്യയശാസ്ത്രങ്ങൾ ഉണ്ടായിരുന്നു. മാതൃസംഘടനയായ ഇന്ത്യൻ നാഷനൽ കോൺഗ്രസ്സിൽ നിന്ന് തെറ്റിപ്പിരിഞ്ഞ് കമ്മ്യൂണിസ്റ്റ് പാർട്ടിയും ജനസംഘവും ഒക്കെ രൂപീകരിച്ചത് അവരുടെ പ്രത്യയശാസ്ത്രം പ്രയോഗത്തിൽ വരുത്താനായിരുന്നു. അതുകൊണ്ട് ഇന്ന് കാണുന്ന ഈ ഇന്ത്യ കോൺഗ്രസ്സ് പാർട്ടിയുടെ സൃഷ്ടിയാണ്. ഈ ഇന്ത്യ ഇങ്ങനെയായതിൽ ജനങ്ങൾ കോൺഗ്രസ്സ് പാർട്ടിയോട് മാത്രം കടപ്പെട്ടിരിക്കുന്നു.

കോൺഗ്രസ്സ് പാർട്ടിയുടെ സാമ്പത്തിക നയങ്ങളും ആധുനികവും പുരോഗനോന്മുഖമായ ചിന്തകളും പഞ്ചവത്സര പദ്ധതികളും ശാസ്ത്രീയമായ പരിഷ്ക്കരണങ്ങളും എല്ലാം കൂടിയാണ് ആധുനിക ഇന്ത്യയെ കെട്ടിപ്പടുത്തത്. ഇതും കോൺഗ്രസ്സ് പാർട്ടിക്ക് മാത്രം കഴിയുന്നതായിരുന്നു. കമ്മ്യൂണിസ്റ്റ് പാർട്ടി വിഭാവനം ചെയ്ത സോഷ്യലിസ്റ്റ് സാമ്പത്തിക നയം സോവിയറ്റ് യൂനിയനെയും ചൈനയെയും എവിടെയും എത്തിച്ചില്ല എന്ന് എല്ലാവർക്കും അറിയാം. സോവിയറ്റ് യൂനിയൻ ഇന്നില്ല. ചൈനയിൽ സോഷ്യലിസവും ഇന്നില്ല. കമ്മ്യൂണിസവും സോഷ്യലിസവും അപ്രായോഗികമായ കാല്പനികസിദ്ധാന്തം മാത്രമാണ്. എന്താണോ പ്രായോഗികം അതാണ് കോൺഗ്രസ്സ് ഇന്ത്യയിൽ നടപ്പാക്കിയത്. കോൺഗ്രസ്സ് പാർട്ടിക്ക് ജനങ്ങളുടെ മേൽ അടിച്ചേല്പിക്കാൻ ഒരു പ്രത്യയശാസ്ത്രമോ സിദ്ധാന്തമോ ഇല്ല. അതുകൊണ്ടാണ് ജനങ്ങളുടെ ഇച്ഛകൾ മാത്രം നടപ്പിലാക്കാൻ ശ്രമിക്കുന്ന ഒരു ലിബറൽ പാർട്ടിയായി കോൺഗ്രസ്സ് നിലനിൽക്കുന്നത്.

രാജ്യത്തെയും ജനങ്ങളെയും മുന്നോട്ട് നയിക്കാൻ മുൻകൂട്ടി എഴുതപ്പെട്ട പ്രത്യയശാസ്ത്രമോ അല്ലെങ്കിൽ പഴഞ്ചൻ സിദ്ധാന്തങ്ങളോ ഗ്രന്ഥങ്ങളോ അല്ല വേണ്ടത്. ഓരോ സമയത്തും ഉയർന്നു വരുന്ന പ്രശ്നങ്ങളെയും വെല്ലുവിളികളെയും പ്രതിസന്ധികളെയും തരണം ചെയ്യാനും മറികടക്കാനും ആവശ്യമായ പ്രായോഗിക സമീപനങ്ങളും നിലപാടുകളും ആണ് വേണ്ടത്. അതാണ് കോൺഗ്രസ്സ് പാർട്ടിയുടെ മേന്മ. കോൺഗ്രസ്സ് പാർട്ടി ഇല്ലാത്ത ഒരു ഇന്ത്യ നമ്മൾ ഇന്ന് കാണുന്ന ഇന്ത്യ ആയിരിക്കില്ല. എന്ത് കുറ്റവും കുറവുകളും ദൂഷ്യങ്ങളും ചൂണ്ടിക്കാട്ടാൻ കഴിഞ്ഞാലും കോൺഗ്രസ്സിനേക്കാളും ഇന്ത്യയ്ക്ക് യോജിച്ച മറ്റൊരു പാർട്ടി ഇന്ത്യയിൽ ഇല്ല എന്നത്  ചിന്തിക്കുന്നവർക്ക് മനസ്സിലാകും. എല്ലാ പൗരന്മാരെയും സമഭാവനയോടെ കാണാനും ഓരോ ഇന്ത്യക്കാരനും ഭാരതപുത്രൻ എന്ന് ഉൾക്കൊള്ളാനും കോൺഗ്രസ്സ് പാർട്ടിക്ക് മാത്രമേ സാധ്യമാകൂ. മറ്റെല്ലാ പാർട്ടികളും വർഗത്തിന്റെയോ, മതത്തിന്റെയോ, പ്രദേശത്തിന്റെയോ, ഭാഷയുടെയോ പേരിൽ ജനങ്ങൾക്കിടയിൽ മതിൽ കെട്ടി വിഭാഗീയത സൃഷ്ടിക്കാൻ നിലകൊള്ളുന്നതാണ്.

നടക്കാൻ പോകുന്ന തെരഞ്ഞെടുപ്പിൽ കോൺഗ്രസ്സ് നേരിടുന്ന വെല്ലുവിളി നിലവിലെ ഭരണകക്ഷിക്കെതിരെ വിശാല സഖ്യം രൂപീകരിക്കുക എന്നതാണ്. ഒരു പൊതുമിനിമം പരിപാടിയുടെ അടിസ്ഥാനത്തിൽ തെരഞ്ഞെടുപ്പിനു മുൻപ് തന്നെ സഖ്യം രൂപീകരിച്ചാൽ മാത്രമേ ഭൂരിപക്ഷം ലഭിച്ചാൽ ഒരു സ്ഥിരതയുള്ള സർക്കാരിനു രൂപം നൽകാൻ കഴിയൂ. തെരഞ്ഞെടുപ്പിനു ശേഷം രൂപപ്പെടുന്ന അവസരവാദപരമായ കൂട്ടുകക്ഷി മന്ത്രിസഭയ്ക്ക് കാലാവധി പൂർത്തിയാകുന്നത് വരെ ആയുസ്സ് പ്രതീക്ഷിക്കാൻ കഴിയില്ല. അല്ലെങ്കിൽ പിന്നെ മുന്നണിക്ക് നേതൃത്വം നൽകുന്ന കോൺഗ്രസ്സിനു കേവല ഭൂരിപക്ഷം ലഭിക്കണം. ഓരോ സംസ്ഥാനത്തും ചിതറിക്കിടക്കുന്ന പ്രാദേശികപാർട്ടികളാണ് കോൺഗ്രസ്സിന്റെ പ്രധാന മുന്നിലുള്ള വെല്ലുവിളി. ഒരർത്ഥത്തിൽ അത് ജനാധിപത്യത്തിന്റെയും ദേശീയോത്ഗ്രഥനത്തിന്റെയും വെല്ലുവിളി കൂടിയാണ്.

എന്നാൽ നിലവിലെ വെല്ലുവിളികളെക്കാളും കോൺഗ്രസ്സിന്റെ സാധ്യതകൾ ജാജ്വല്യമാനമാണ് എന്ന് നിസ്സംശയം പറയാൻ കഴിയും. അതിൽ ഏറ്റവും പ്രധാനം രാഹുൽ ഗാന്ധി ഈ അഞ്ച് വർഷം കൊണ്ട് എതിരാളികളെ പോലും അമ്പരപ്പിക്കും വിധം ഇരുത്തം വന്ന ഒരു ദേശീയ നേതാവായി വളർന്നു എന്നതാണ്. രാഹുൽ ഗാന്ധിക്ക് മാത്രമേ പൊതുവെ സ്വതന്ത്ര ചിന്താഗതിക്കാരായ കോൺഗ്രസ്സുകാരെ ഒരുമിപ്പിക്കാനും ഒരൊറ്റ ചരടിൽ കോർത്തിണക്കാനും കഴിയൂ. എതിരാളികൾ എന്ത് വിശേഷിപ്പിച്ചാലും കോൺഗ്രസ്സ് പാർട്ടി ദേശീയാടിസ്ഥാനത്തിൽ ഒറ്റക്കെട്ട് ആണെന്നതും ഒരപസ്വരവും പാർട്ടിക്കുള്ളിൽ ഇല്ല എന്നതും എടുത്ത് പറയേണ്ടതുണ്ട്. രാഹുൽ ഗാന്ധിയുടെ നേതൃത്വം ആണ് ഈ ഐക്യം സാധ്യമാക്കുന്നത്. അത് കാണാതിരുന്നുകൂട.

നിലവിലെ പ്രധാനമന്ത്രിയിൽ ജനങ്ങൾക്ക് മടുപ്പ് മാത്രമല്ല, ആകാശം മുട്ടെ പ്രതീക്ഷകൾ നൽകിയിട്ട് തങ്ങൾ വഞ്ചിക്കപ്പെട്ട ഒരു പ്രതീതിയും ആണ് ജനങ്ങൾക്കുള്ളത്. ഒരു വാഗ്ദാനവും നിലവിലെ പ്രധാനമന്ത്രിക്ക് നിറവേറ്റാൻ കഴിഞ്ഞില്ല എന്ന് മാത്രമല്ല നോട്ട് നിരോധനം, അശാസ്ത്രീയമായ ജി.എസ്.ടി എന്നിവ നിമിത്തം രാജ്യത്ത് തൊഴിലില്ലായ്മ വർദ്ധിക്കുകയും സാമ്പത്തിക മുരടിപ്പ് ഉണ്ടാവുകയും ചെയ്തിട്ടുണ്ട്. ഒരു മാറ്റത്തിനു വേണ്ടി ജനം ആഗ്രഹിക്കുകയും വോട്ട് ചെയ്യുകയും ചെയ്യും. ഉത്തരേന്ത്യയിൽ നടന്ന നിയമസഭാ തെരഞ്ഞെടുപ്പുകളിൽ മൂന്ന് സംസ്ഥാനങ്ങളിൽ കോൺഗ്രസ്സിനു അധികാരത്തിൽ തിരിച്ചു വരാൻ കഴിഞ്ഞത് അതിന്റെ പ്രകടമായ സൂചനയാണ്. പ്രിയങ്ക ഗാന്ധിയുടെ രാഷ്ട്രീയപ്രവേശവും ഹിന്ദി ഹൃദയഭൂമിയിലെ രാഷ്ട്രീയ സമവാക്യങ്ങൾ കോൺഗ്രസ്സിനു അനുകൂലമായ ഒരു തരംഗം സൃഷ്ടിക്കാതിരിക്കില്ല.

എന്തായാലും വരുന്ന തെരഞ്ഞെടുപ്പിൽ ഒരു ഭരണമാറ്റം സംഭവിക്കും. കോൺഗ്രസ്സ് പാർട്ടി നിലവിൽ വരുന്ന സർക്കാരിനു നേതൃത്വം നൽകുകയും ചെയ്യും. മുന്നോട്ടേക്ക് നടക്കുന്ന, നടക്കാൻ കഴിയുന്ന പാർട്ടി കോൺഗ്രസ്സ് മാത്രമാണ്. കോൺഗ്രസ്സിനു ജനാധിപത്യ ഭാരതത്തിൽ ശോഭനമായ ഭാവിയാണുള്ളത്. കാരണം ഭാവിയെ പ്രതിനിധാനം ചെയ്യുന്ന പാർട്ടി ഇന്ത്യൻ നാഷനൽ കോൺഗ്രസ്സ് മാത്രമാണ്. ഇന്ത്യയിലെ മറ്റ് പാർട്ടികളുമായി താരതമ്യം ചെയ്താൽ ചിന്തിക്കുന്ന ആർക്കും ഈ നിഗമനത്തിൽ മാത്രമേ എത്താൻ കഴിയൂ.